Disko Linep ilaasartaatitaava kinguaattooqqittoq

Disko Linep ilaasartaatertaava sapaatit akunneri pingasut missaata matuma siorna atserneqarmat oqalugiartoqarlunilu qungujulalluartoqarpoq.

”Maliina Ittuk” taanna pilersaarutit malillugit nunatta kujataani juulip qiteqqunneranit angallassisussanngoriartorluni nunatsinnut juunip naanerani aallartussaagaluarpoq.

Umiarsuarli 38 meterinik takissuseqartoq suli Faaborgip Amutsivianiippoq.

Misiliinerni kingullerni naatsorsuutiginngisanik ilungersunartoqarnera pissutigalugu umiarsuup nunatta tungaanut aallarnissaa qaammatit marluk missaannik kinguartinneqarpoq.

Disko Line A/S-ip pisortaanera Michael Højgaard oqarpoq.

- Atortut elektroniskiusut imminnut ataqatigiittut assigiinngitsorpassuit tamarmik immikkut umiarsuup ingerlasinnaanissaanut ajoquteqartussaanngitsut misilittarneqarput. 

- Aaqqissuunneralli ataqatigiisinnissaannut ajornartorsiuterpassuaqartoq paasinarsivoq. Elektroniskiusut aaqqissuussaanerat naatsorsuutigisatsinnit ajornartorsiutigineruagut, taanna oqarpoq.

- Umiarsuarmi tassani aaqqiivigineqartariaqartunik taama amerlatigisunik unammilligassaqarsimasimammat assut ajuusaarutigivarput, Disko Line A/S-imi pisortaq, Michael Højgaard, oqarpoq. Assi © : Disko Line A/S

Tamatuma saniatigut aasaanerani sulinngiffeqartoqarnera atortunik nutaanik pissarsiniarnermut unammillernartoqartitsisoq taanna nassuiaavoq.

- Suliffeqarfissuarpassuarni sulinngiffeqartoqarneranut juulimut appakaannerput pissutigalugu qaammammi matumani misileraanerujussuaqarsinnaanngilaq, tamannalu kinguarnerutitsivoq, Michael Højgaard oqarpoq.

Taamaammat Maliina Ittuk septembarip qulingiluaani piareernissaa maanna naatsorsuutgiineqarpoq.

Ukiumik ataatsimik kinguaattooreersoq

Maliina Ittuk innaallagiatortuullunilu ikummatissatortuuvoq. Taanna nunatsinni taamaattuni siulliussaaq.

Umiarsuaq Assens Skibsværftikkut piniarneqarmat siorna aasakkkut ilaasussanik angallassilereersinnaanissaa pilersaarutaagaluarpoq.

Ajutoortoqarporli, taamaalilluni Faaborg Værftip suliaq januaarimi nangippaa umiarsuarmillu sanaartorneq naammassisarlugu. Umiarsuullu ukioq manna juulip qiteqqunneranit ingerlalersinnaanissaa pilersaarutigineqalerpoq.

Taamaammat pilersaarutit maanna kinguarteqqinneqarnerat Michael Højgaardip aamma uggoraa.

- Umiarsuarmik ingerlatsinissamut ilungersunartut taama amerlatiginerat uggoringaatsiarparput. Umiarsuaq qangali aallartereertussaagaluarpoq, aasaq mannalu atulereernissaa neriuutigilluinnaraluarparput, taanna oqarpoq.

Erinarsortartup, Julie Berthelsenip umiarsuaq juulip ulluisa 14-iani atserpaa. Julie Berthelsen umiarsuup inersuani eqqumiitsuliarujussuup tunuani aamma nikorfavoq. Assi © : Noëlle Simoud

Disko Linep pisortaata ilaasussat aasap ingerlanerani angallanneqarnissartik ernumassutigissanngikkaat ilanngullugu erseqqissaatigaa.

Imaatigut angallassinerit pilersaarutaasut ingerlanneqassapput – Maliina Ittulli atornagu targat atorneqassapput.

- Taamaatitsisoqassanngilaq. Kisianni pitsanngorsaanissarput neriuutigigaluarparput. Pissutsinik allanngortitsiinnassaagut, Michael Højgaard oqarpoq.

Maliina Ittuk 113-inik ilaasoqarsinnaavoq.