Meeqqat atuarfii pitsaanerulersinniarlugit Kujalleq aaqqissugaanermik politikkiliulersoq
Borgmesterillu maanna meeqqat atuarfii pitsaanerulersinniarlugit kommuni aaqqissugaanermik politikkiliussasoq nalunaarutigaa.
- Ukiup kingulliup naanerani ataatsimiititaliamik, atuarfeqarnermut ataatsimiititaliamik nutaamik pilersitsivugut. Ukiup aallartilaarnerani atuarfeqarnermut isumasioqatigiinneq ingerlanneqarpoq, maannakkullu aamma illoqarfinni tamani ilinniartitsisooqatigiit tamarmik ataatsimeeqatigineqarput aammalu ingerlaavartumik ataatsimeeqatigiittarnerit ingerlanneqalernissaat isumaqatigiissutaalluni, Kommunimi meeqqat atuarfiisa pitsaassutsimik nalunaarusiaannik kommuni ajornartorsiuteqarnera KNR-ip sammereeraalu, Kommune Kujallermi Siumuup borgmesteriititaa, Jørgen Wæver Johansen KNR-imut oqarpoq.
Aamma atuaruk Kommune Kujallermi meeqqat atuarfiisa inatsit unioqqutippaat
Meeqqat atuarfii upernaaq 2015-imi naliliiffigineqarput, taamanilu inatsisit malinneqannginneri tikkuarneqarpoq. Naliliinerup eqikkarnerani ilaatigut ima allassimasoqarpoq:
"Kommunini ingerlatsivinni sulisut ikittuararsuupput, ingerlatsiviillu atuarfinnik imarisaatigut perorsaanernilu aqutsineq ineriartortitsinerlu pillugit atuarfik pillugu inatsimmi eqqarsaataasimagaluartumut sanilliullugu kommunit annikitsuinnarmik tapersiipput."
Tamannalu Kommune Kujallermi atuarfeqarnermut meeqqeriveqarnermullu ingerlatsivimmi pisortap, Jens Korneliussenip oqaatigisaanut naapertuuppoq, taassumami pitsaassutsimik nalunaarusiat suliarineqarsimannginnerannut ingerlatsivinni sulisukippallaarneq peqqutaaneraramiuk.
Aamma atuaruk Sulisunik amigateqarneq pissutigalugu nalunaarusiat suliarineqanngillat
Jørgen Wæver Johansen naapertorlugu kommunip meeqqat atuarfii samminerulernikuuai.
- Atuarfeqarnermut tunngasut nunatsinni kommuneqarfinni qularinngilara tamani pingaartinneqangaarlutik inissisimapput, aamma taamaappoq uagut kommuneqarfitsinni, Jørgen Wæver Johansen oqarpoq.
Kommune Kujallermi ukioq 2016 meeqqat atuarfiisa ukiuattut taaneqarpoq. Tassungalu atatillugu kommuni aaqqissugaanermut politikkiliorpoq meeqqallu atuarfii tassunga ilaapput, tassungalu aamma aningaasaliisoqartoq borgmesteri nassuiaavoq:
- Aaqqissugaanermut politikkip iluani aningaasaliissutit ukioq manna immikkut immikkoortillugit inissinneqarsimasut 8 millionit koruuniupput. Taakkua tamarmik suliniutit assigiinngitsut atorlugit aamma minnerunngitsumik meeqqanut inuusuttunullu tunngassuteqartut, atorneqarnissaat siunnerfiuvoq, Kommune Kujallermi borgmesteri Jørgen Wæver Johansen oqarpoq.
Aamma atuaruk Nivi Olsen: Kommunit suliatik aaqqiivigisariaqarpaat
Aamma atuaruk Atuarfeqarnermut ataatsimiititaliami siullittaasoq pitsanngoriaateqarnissamik neriorsuivoq