Kommune Kujallermi meeqqat atuarfiisa inatsit unioqqutippaat
Atuarfinni ataasiakkaani ajornartorsiuteqarpat, tamakkua kommunalbestyrelsit nalunaarusiatigut naammattorsinnaasussaavaat.
Kommunalbestyrelsit atuarfinnik ataasiakkaanik nakkutiginninnisamut periarfissaat 2012-mi pitsaanerulerput. Inatsit nutaaq akuersissutigineqarpoq, Atuarfiillu pitsaassutsimik nalunaarusiaat atuarfiit ataasiakkaat ineriartornissaannut sakkuulerput pingaartut.
Atuarfiit ataasiakkaat pisortaat pitsaassutsimik nalunaarusiornissamik kommunalbestyrelsimullu ukiut tamaasa oktobarip aallaqqaataatinnagu tunniussinissamik akisussaasuupput.
Maannali paasinarsivoq Kommune Kujalleq inatsisip malinnissaanut ajornartorsiuteqartoq.
- Atuarfitsinniit 2015-imi pitsaassutsimik nalunaarusianik tigusaqarsimanngilagut - katersoraluarpagut, tigusavulli atorsinnaasimanngillat, Jens Korneliussen Meeqqanut Kulturimullu Ingerlatsivimmi pisortaq oqarpoq.
Ingerlatsivimmi pisortaq naapertorlugu nalunaarusiat tunniunneqannginnerinut qanoq suliarinissaannut naalakkersuisoqarfimmiit ilitsersuusiortoqarsimannginnera peqqutaavoq.
- Naalakkersuisoqarfimmiit nalunaarusiat qanoq allannissaannut ilitsersuummik takkuttoqarnissaa naatsorsuutigineqarsimavoq, taamaalisoqaranili, Jens Korneliussen oqarpoq.
Nalunaarusialli isikkussaannut inatsimmi piumasaqaatinik allassimasoqanngilaq, ilitsersuuteqartoqanngikkaluartorlu Kommuneqarfik Sermersooq Qeqqata Kommunialu pitsaassutsimik nalunaarusiorsinnaasimallutik.
Pitsaassutsimut nalunaarusiat suliarineqarsimannginneri marlunngorpat sammeqqikkumaarpavut.