Mitdlarak Lennert: Meeqqat atuarfiat pillugu suleqatigiinniarnerat pitsaalluinnarpoq
- Nuannaarutiginarpoq kommunit ataatsimoorlutik meeqqat atuarfiata tungaatigut suleqatigiimmata. Kommunit atuarfeqarfiup tungaatigut taamatut suleqatigiinnerat oqaluttuarisaanitsinni siullersaajugunarpoq, Mitdlarak Lennert, suliniut 'Kalaallit Nunaanni meeqqat atuarfiannik kivitsiniarneq'-mik taaguuteqartoq pillugu, oqarpoq.
Ilinniartitseriaatsit nutaat, ilinniartitsisut pikkorissarneqarsimasut, atortullu, teknologiskiusut digitaliusullu suliniummi qitiutillugit, atuartitsinermut naleqqussarneqarlutillu pitsaanerulersinneqarnissaat kommuninit tallimaasunit suliniutigineqarput.
AAMMA ATUARUK Kommunit tamarmik meeqqat atuarfiat pillugu suleqatigiinniartut
Ilaatigut atuartut ilinniartitsisullu tamarmik Ipadimik tunineqassapput.
Kommunillu meeqqat atuarfiannik pitsanngorsaarusullutik suleqatigiinnerat pitsaasuusoq, Mitdlarak Lennert isumaqarpoq.
- Taamatut suleqatigiinnerup iluaqutigissavaa ataatsimoorussamik sulineq taavalu suliap ilusilersornerani suliarineqarneranilu aningaasat sulisullu atorluarneqarnerunissaat suliniut ataaseq aallullugu.
AAMMA ATUARUK Uuttortaasarnissamik piumasaqaatit pingaartut peerneqarsimasut
Suliarli angeqimmat eqqumaffigisassat arlaqartut, Mitdlarak Lennertip erseqqissaatigaa. Ilinniartitaanermut naalakkersuisoqarfik taassuma saniatigut aaqqissuusseqqinniarpoq:
- Kisianni sulinermi aamma una maluginiagassaassaaq; kommunit suliniut angisooq massakkut aallartippaat, atulersinniartussaassallugulu, taava illuatungaani ilinniartitaanermut naalakkersuisoqarfik aamma pilersaaruteqarpoq ukiuni qanittuni annertuumik aaqqissuusseqqinnissamik. Taava sulisoqarneq aningaasallu killeqartut eqqarsaatigalugit suliat angisuut marluk tamarmik ataatsikkut kivinneqarsinnaanersut eqqarsaatigisassaassaaq.
