Politikki Ilinniarneq

Uuttortaasarnissamik piumasaqaatit pingaartut peerneqarsimasut

Meeqat atuarfiat angusarissaarfiunerussappat, politikerit nunatsinni atuarfiit qanimut malinnaaffigisariaqarpaat.Taamaammat meeqqat atuarfianni iliuutsit sunniutaannik uuttuisarnissamik piumasaqaatit immikkuullarissut politikerit peersimammatigit, immikkut ilisimasalik ugguarpoq.

Allattoq Thomas Munk Veirum

apriilip 18-at 2018 07:31

Meeqat Atuarfiat pillugu oqallineq naqqani isiginnaaruk.

Qinigassanngortittut meeqqat atuarfiat ukkatareqaat.

Poltikerit atuarfimmi naammassisat pitsaanerulersikkusukkunikkit, iliuutsit sorliit angusaqaataalluarnerusarnersut uuttortallattaasariaqarpaat. Partiilli tamarmik taamaaliortarunnaarnissamik aalajangiipput.

Atuarfitsialammik taallugu 2002-mi iluarsaaqqinneq piviusunngortinneqanngisaannarpoq -
inatsimmi siunertaasoq malinneqanngilaq, Meeqqat atuarfianni misissuinerujussuarmi 2015-imeersumi tamanna inerniliussaavoq.

Mitdlarak Lennertip Ph.d.-nngorniummini meeqqat atuarfiat sammivaa, oqaluttuarporlu, politikerit meeqqat atuarfiata ineriartorneranik malinnaasinnaaniassagunik iluatsinngitsullu iluarsiniassagunikkit, iliuutsit sunniutaat uuttortartarnissaat pingartuusoq, tamannalu Naalakkersuisut akisussaaffigigaat.

Piviusoq ilisimanagu aalajangiinissaq ajornakusuussaqaaq

Uuttortortagassat ilaat naammassineqarsimanngillat, sorpiaallu uttortarneqarnissaannut piumasaqaatit inatsimmiit siorna peerneqarput:

-Suunukua nakkutigineqassasut? Atuartitsineq qanoq innersoq? Nakkutilliisussat suut aallaavigalugit nakutilliissappat? Taakkua oqaatigineqarnikuunngiinamik. Taamaammat nakkutilliinissaq aamma ajornakusoorsimassaaq, Mitdlarak Lennert, Ilisimatusarfimmi inuiaqatigiilerinerup iluani Ph.d.-nngorniaasoq, taama nassuiaavoq.

AAMMA ATUARUK Aaqqissuusseqqinnikkut aaqqiissutissat kinguarsarneqarput

Taama aalajangersimaneq taasuma uggoraa, isumaqarami, politikerit meeqqat atuarfiannik pitsanngorsaaniarnerminni nunarsuarmi allanut angalasariaqanngitsut. Tassami atuarfinnik nunatsinni ingerlalluartorpassuaqarpoq, ilikkarfiusinnaasunik. Tamatumunngalu iliuutsit sunniutaannik uuttortaasarneq atorluarsinnaavoq:

- Atuarfiit ingerlalluartut sooq ingerlalluarneri pasisuugutsigit, taakkua suliniutaat atuarfinnut allanut ingerlateqqinneqarsinnaassagaluarput. Atuarfiit imminnut taamaasillutik ikioqatigiinnerusinnaagaluarput, imminnut ilikkagaqarfigalutik, Atuarfitsialak pillugu immikkut ilisimasalik Mitdlarak Lennert oqarpoq.

Inatsisip allannguutaa, meeqqat atuarfianni allannguinernik arlalinnik imaqartoq, inatsisartuni partiinit tamanit akuerineqarpoq.

Paragrafip, naalakkersuisut sunik uuttortaasarnissaannik tigussaalluinnartumik aalajangersaaffiusimasup allannguutaa uani ataani takuneqarsinnaavoq.

Saamerlermi paragrafiusimasoq immikkuualuttortaqarpoq. Talerpiani paragrafi nutaaq, taamatorluinnaq oqaasertalik, immikkoortortaqanngitsorli.

Imm. 3. Naalakkersuisut ilisimasanik eqiterineq aamma siammarterineq isumagissavaat meeqqat atuarfiannik kommunalbestyrelsip isumaginninnera nukittorsarniarlugu aamma nukinnik atorluaaneq sapinngisaq annertunerpaaq anguniarlugu. Kiisalu Naalakkersuisut sulinniutit sunniutaannik uuttuineq isumagissavaat ukunani:
1) immikkut ittumik atuartitsineq,
2) efterskolernerit sorliit ilinniarnermik aallartitsinissamut naammassinninnissamullu kinguneqarluarnerpaajusarnersut,
3) siunnersuinerit sorliit ilinniagaqalernermik kinguneqarluarnerpaajusarnersut,
4) atuarfinni angisuuni marlunnik ilinniartitsisoqartarnerup karakterit agguaqatigiissinnerinut aamma ilinniakkap naammassineqartarneranut qanoq sunniuteqartarnersoq,
5) ilinniarnertuunngorniarfimmi inuutissarsiutinillu ilinniartitsinerni ilinniarnermik taamaatitsisarnerup pinngitsoortinniarnerani sulinniuteqarneq,
6) ilinniartitsisutut ilinniarsimanngitsut atuartitsinerisa inaarustaasumik misilitsitsinerni karakterinut aamma ilinniarnermut sunniutaat,
7) ilinniartitsisut ilinniarnerminni atuartitsissutissat itisilerlugit ilinniarsimasaminnik atuartitsinerisa annertussusaat atuarfiullu angusaanut sunniutaat, aamma
8) inooqataanermi kingornuttakkat akornutit akiorniarlugit suliniutit.

14. § 36, imm. 3 imatut oqaasertalerneqassaaq: ” Imm. 3. Naalakkersuisut ilutigitillugu, kommunalbestyrelsip meeqqat atuarfiannik isumaginninnera nukittorsarniarlugu aamma nukinnik atorluaaneq sapinngisamik annertunerpaaq anguniarlugu, ilisimasanik eqiterineq, tamatumani aamma nalilersuinertigut 5 sunniutaasunillu uuttuinertigut aamma ilisimasanik siammarterineq isumagissavaat.”

Siunnersuummut oqaasertaliussani allannguut pillugu ilaatigut allassimavoq:

- Naalakkersuisut nalilertussaavaat suut uuttortassallugit naleqqunnerpaajunersut aammalu suut sunniutaasut pillugit nalilersussallugit naleqqunnerpaajunersut.
Aamma aningaasaqarnikkut kingunerussat ataani ima allassimasoqarpoq:

- Sunniutaasunik uuttortaasarnerit pillugit allannguutit isumalluutitigut sipaaruteqarfiussanngillat tamannalu sanilliunneqassaaq maannamut suliassaqarfinnut peerneqartussanut tunngasunik sunniutaasunik uuttuisoqartarsimanngimmat.

Iliuutsit sunniutaannik uuttortaasoqarneq ajortoq inatsisartuni ilaasortat 2016-imi upernaakkut maluginiaqqaarpaat.

Inatsisartut ilinniartitaanermut, kultureqarnermut, ilisimatusarnermut ilageeqarnermullu ataatsimiititaliaa taamani ima isornartorsiuivoq:

- Naalakkersuisut inatsisit tunngavigalugit suliassatik nalunngikkaluarlugit suliarisanngimmatigit ataatsimiititaliamit naammagineqanngilaq isorilluinnameqarlunilu.

Meeqat Atuarfiat pillugu oqallineq uani isiginnaaruk:

Inatsisartunut qinersineq 2018 - Oqallinneq, KNR 16.04.2018

Uuttortaasarnissamik piumasaqaatit pingaartut peerneqarsimasut

Piviusoq ilisimanagu aalajangiinissaq ajornakusuussaqaaq

Aamma atuaruk