Adjunkti: Aaqqissuusseqqinnikkut aaqqiissutissat kinguarsarneqarput
Meeqqat atuarfiat pillugu nalilersuineq naammassineqarmalli ukiut pingasut ingerlareersimalerput. Millaaraq Lennert, Ilisimatusarfimmi ph.d-nngorniartoq, meeqqat atuarfiat pillugu ilisimatusarpoq.
Millaaqqap meeqqat atuarfianni aaqqissuusseqqinnerit ilisimatusarnikkut qanimut malinnaavigisarpai.
AAMMA ATUARUK Meeqqat Atuarfiannik naliliinerup ajoquterpassuit qulaarpai
Nalilersuinermilu aaqqitassatut tikkuarneqartut politikikkut qanorpiaq atorniarneqarnersut, taassuma takujuminaatsippaa.
- Suunuku tunngavigalugit aaqqissuusseqqinnerit pisartut - tamannalu amigaatiginarsinnaavoq nalilersuinerit aallaavigalugit aaqqissuusseqqittarneq, Millaaraq Lennert taama oqarpoq.
Pereersut uteqqinneqartut
Oqallinneq KNR-TV-kkut toqqaannartumik aallakaatinneqassaaq, kalaallisut nal. 19.30, danskisullu nal. 21.00.
Naalakkersuisut kingulliit nutaamik aaqqissuusseqqinniarlutik pilersaarusiorsimapput. Tamannalu takornartaanngilaq.
80-kunnili meeqqat atuarfiat akisussaaffigileratsigu, aaqqissuusseqqinnerit tamatigut pappiaqqatigut kusanariarlutik piviusunngortinneqarnissaalli ajornakusoortittarsimavaat, paasigaangamikkulu una politikkikkut iluatsippallaanngitsoq nutaamik aaqqissuusseqqittarsimapput.
- Utaqqisariaqanngikkaluarpugut iliuuseqarnissatsinnut. Massakkut inatsit una aallaavigalugu iliuuseqariaannaavugut. Qanoruna suleqatigiinnerullutik iliuuseqartoqarniartoq - qanoruna pilersaarusiorniartut - suunuku anguniakkat allattorniaraat angunialerlugillu ataavartumik nalilersuiffigalugit. Taamaasilluni iliuuseqartoqarsinnaagaluarpoq. Taavalu taakku nalilersuinerit aallaavigalugit suliat ineriartortillugit, Millaaraq Lennert, Ilisimatusarfimmi ph.d-nngorniartoq, meeqqat atuarfiat pillugu ilisimatusartoq, taama oqarpoq.
Aningaasaqarnermut Siunnersuisoqatigiit meeqqat atuarfiata aaqqissuuteqqinneqarnissaanik pilersaarut pillugu ilaatigut ima allappoq:
Aningaasanut inatsisissatut siunnersuummi ilinniartitaanermik aaqqissuussinermik ataqatigiinnerusumik peqalernissamik aalajangernerit aaqqissuusseqqinnernik utaqqinneqassasut siunniunneqarpoq. Piareersaasiorluni sulinerit siusinnerpaamik 2019-imi naammassineqarsimassapput, taamaalillunilu politikikkut aalajangernerit aatsaat 2020-imi 2021-imiluunniit pisinnaassallutik. Tamanna ajornartorsiutit ilisimaarilluarneqartut pingaarutillillu eqqarsaatigissagaanni sivisuvoq, ingammik meeqqat atuarfiannut atatillugu. Suliat sivisuumik taamatut ingerlanneqarneranni, ilinniartitaanerni inuusuttut ukioqatigiiaat amerlanerit annaaneqartarnerannik akeqarpoq.
Najoqqutarisaq: Aningaasaqarnermut Siunnersuisoqatigiit nalunaarusiaat: Nunatta Aningaasaqarnera 2017
Lennert: Atuutilersitsinissaq immikkoortut pingaarnersaraat
- Tassa taamatut pissutsit ingerlarujoorput: aaqqissuusseqqinnerit ukiut qulikkaapajaarlugit pisarput.
Qanormiuna taava iliortoqartariaqaraluartoq atuarfitsialaap atuarfitsialanngortinneqarnissaanut:
Meeqqat atuarfiat pillugu nalilersuisoqarmat oqariartuutigineqartut ilagaat meeqqat atuarfiat pillugu inatsit namminermi naleqquttoq, kisianni tamakkiisumik atuuttussanngortinneqarsimanani.
Iliuuseqarnissarlumi tullinnguuttoq, ilisimatooq oqarpoq.