Inatsisartut ukiaanerani ataatsimiinnertik nangillugu ullumi ataatsimiilerunik, nunatsinni iliuuseqarfigisariaqagaq ilungersunartoq politikkikkut aaqqiivigineqarsinnaanersoq oqaluuserissavaat.

Siunnersuummi ima allapput: Nunatsinni meeqqat angerlarsimaffiup avataanut inissinneqartarnerannut atatillugu aningaasartuutit annertuumik annertusiartuinnartunut qanoq annikillisaasinnaanerluta, immikkut ilisimasallit inuttaralugit suleqatigiissitaq piviusorsiortunik innersuussisussatut pilersinneqarnissaa anguniarlugu Naalakkersuisut peqquneqassasut Inatsisartunut aalajangiiffigisassatut siunnersuut.

Siunnersuuteqartuuvoq Demokraatineersoq Bjørk Lange Olsen, KNR-imullu ima tunngavilersuivoq: 

- Siunnersuuteqarpunga kisitsisit kommuunininngaanneersut ersarissumik takutimmassuk angerlarsimaffiup avataanut inissiisarnernut aningaasartuutit annertoorujussuarmik annertusiartortut, taamaasillutillu kommuunit aningaasaqarnerannut ajornakusoortitsillutik. Ajornartorsiutip qisuariarfiginissaa pingaaruteqarluinnarpoq, ineriartornerlu tamanna pitsaanngitsoq ajoquserneqanngitsutullusooq ittoq taamaaginnarsinnaanngilaq.

Angarlarsimaffiup avataanut inissiineq akitsortoq 

Meeqqat angerlarsimaffimmik avataanut nutsitaagaangata nunatsinni kommuninut akisoorujussuusinnaasarnera nutaarsiassaanngilaq. Kisianni aningaasartuutit pissusissamisoorsorinanngitsumik – pingaartumik ukiuni kingullerni tallimani - qaffarujussuarsimapput.

Assersuutitut taaneqarsinnaavoq Kommuni Qeqertalik: 2018-mi aningaasartuutigineqarsimapput 13,5 millioni koruuniniik 2022-milu 19,2 millioni koruuninut qaffariaateqarsimapput. Qaffariaat procentinngorlugu 42,2-voq.

Qaffariaatit taamaannerat kommunit aningaasaqarniarnerannut kingunerluuteqarsinnaasoq, Bjørk Lange Olsen isumaqarpoq:

- Kommunit ilaat artorsareeqaat. Soorunami, aningaasartuutit taama amerliartortigisut, amerliartuinnavissorinartullu isorineqartariaqavipput, oqarpoq nangillunilu:

- Iliuuseqarfigineqanngikkunimmi, kommunit isumagisassaanut allanut tussapput, soorlu ulluunerani paaqqinnittarfeqarnermut, meeqqat atuarfiinut aamma isumagisassanut allanut sipaarfiulertariaqarsinnaasunut ajornartorsiutinngorsinnaallutik.

Uani meeqqat angerlarsimaffiup avataanut inissinneqartariaqalernerat pineqanngilaq, kisianni inissiinermi najugaqartitsinermut kommunit aningaasartuutaasa qaffarujussuarsimasut akileruminaatsinneqaraluttuinnarnerat pineqarluni:

- Tassami isumaqarpunga meeqqanik angerlarsimaffiup avataanut aatsaat inissiisoqartartoq pisariaqartinneqaraangat. Meeraq eqqarsaarsaatiginerullugu iliuuseqartoqartariaqarmat. Taamaammat inissiinermut akigititaasartut qaffasippallaalersimasorinarput.

Ajornartorsiutit siusinnerusukkut aaqqiiviusarlik

Bjørk Lange Olsen neriuppoq, Inatsisartut siunnersuut aalajangiiffigissagaat taamaalilluni Naalakkersuisut peqquneqassammata suleqatigiissitamik immikkut ilisimasalinnik inuttaqartussamik - piviusorsiortunik innersuussisartussanik - pilersitsissasut. Immaqa taamaalilluni aamma meeqqat ilaqutariillu akikinnerusumik ikiorserneqarnissaat anguneqarsinnaassaq.

Meeqqanut ilaqutariinnullu aaqqiissutaasinnaasunik aamma aaqqiisinnaassasut aamma neriuutigaa:

- Demokraatiniit siusinaartumik ikiorsiisarnissaq anguniagaraarput. Ilisimatusarnerimmi takutittareerpaat meeraq siusinnerusukkut ikiorserneqarpat kingusinnerusukkut pisortanut aningaasartuutaannginnerussasoq. Aningaasaliiaarneq taamaattumik pitsaasumik siunissamut aningaasaliinerussaaq, Bjørk Lange Olsen oqarpoq. 

Eqqaamassalluguli pingaartuunerarpaa, uani meeqqat pineqarmata, ooriinnaanngitsut, Bjørk Lange Olsen oqaluttuarpoq:

- Siunnersuummi matumani uannut pingaaruteqarluinnarpoq naqissusissallugu innersuussutit meeqqap inerikkiartornissaanut, toqqissisimanissaanut aammalu illersorneqarnissaanut innarliissanngitsut.

- Qanoq angerlarsimaffiup avataanut inissiisarnernut aningaasartuutit annikillisarneqarsinnaanersut tulleriiaarinerlu uani pineqaraluartoq, meeqqat siulliutinneqartassapput, oqarpoq.

Inatsisartut aalajangiiffissatut siunnersuut ullumi siullermiissavaat, novembarillu ulluisa qulingiluaanni taannarpiaq sammeqqissallugu.