Kommuni sipaalersoq taamaasillunilu 18 millionit nalinginik sipaarniuteqalerluni
Avannaata Kommuniani allattoqarfik kommunalbestyrelsimut toqqaannaq aarlerisaarivoq: Aningaasartuutit matussuserneqarnissaat akissaqartinneqassappata aningaasaqarnerput annertunerusariaqarpoq.
Naak kommunip 2023-mut missingersuutini malikkaluaraa akiliisinnaassuseqarnera (aningaasat sinneqartoorutit, aaqq.) ilungersunartortaqalersimavoq. Tamanna 2022-mi ilimaginngisamik aningaasartuutinit pissuteqarpoq, sualummik Ilaqutareeqarnermut Ingerlatsiviup iluani.
Ukioq kingulleq ilaatigut angerlarsimaffiup avataanut meeqqanik qulingiluanik inissiinerit kingunerisaannik missingersuut 17 millionit koruuninik sipporneqarpoq. Missingersuutimik sippuineq aningaasaatinit atuiffiusimavoq, taamaammallu kommunalbestyrelsi ataasinngormat immikkut ittumik ataatsimiissimavoq.
Ataatsimiinnerup nalaani kommuni tamakkerlugu 2 procentimik sipaaruteqartoqarnissaa politikerit aamma borgmesteri Palle Jerimiassen isumaqatigiissutigaat. Tamanna 18 millionit koruuninik naleqarpoq. Tamanna ilutigalugu nutaanik sanaartornissat suli aallartinneqarsimanngitsut ukiup tullissaanut kinguartinneqarput. Aammattaaq kommunimi aningaasanik tigoriaannagassanik 35 millionit koruuninik qulakkeerinnittoqarpoq.
Naatsorsuutit malinneqartut
Ingerlatsivik sorleq eqqorneqarnerpaajussanersoq pillugu apeqqummut borgmesteri ima akivoq:
- Suliami uani (ingerlatsiviit tallimat, aaqq.) tamarmik eqqorneqassapput. Pisinnaasarpulli tamaat innuttaasutsinnut sullisinitta eqqorneqarnissaa pinaveersaassavarput, Palle Jerimiassen oqarpoq nangillunilu:
- Kontot tamarmik sipaarniarfigineqassapput, tassami 18 millionit tiguneqassammata. Suliassaqarfiit ilaat eqqorneqassapput, kisianni innuttaasunik sullissinitsinnut malunniuteqarpallaarnavianngilaq.
Kommunip 2023-mut naatsorsuusiaata malinneqarnera borgmesterip erseqqissarpaa.
- Missingersuut qaangerneqanngilaq. Aningaasat tigoriaannagassagut nukittorsarusuppagut pissutigalugu ullormut atuinerit akilernissaanut qajannarpallaarmata. Taamaasiunngikkutta ajornartorsiulissaagut.
