Nunatsinni kommunit meeqqanik allamut inissiinissamik suliaat ajornartorsiuteqaqisut taakkualu isumaginnittoqarfiisa suliaat kukkuneqaqalutillu sumiginnaanertaqaqisut sapaatit akunnerini kingullerni oqaluttuarisareeripput, meeqqanut, inuusuttunut ilaqutariinnullu naalakkersuisoq Aqqaluaq B. Egede ajornartorsiutip taassuma qanoq aaqqinneqarnissaanik suliaqartoqarsinnaanersoq misissuinialerpoq:

- Politikkikkut oqallisissaavoq. Taamaammat naalakkersuisutut suliap ingerlannissaani isumaginninnermi siunnersortit peqatigiiffiat,  MIO, Tilioq aamma kommunit tamaasa oqaloqatigerusuppakka, ajornartorsiutip taassuma qanoq aaqqinneqarnissaanik atatsimoorluta suliaqarsinnaanersugut paasiniarlugu. 

Kommunit tamatumani ajornartorsiornertik nassuerutigalugu Naalakkersuisunut ikioqqupput. Tusaaneqarpullu, taamaammallu naalakkersuisoq Aqqaluaq B. Egede kommunit isumaginnittoqarfiini suleriutsit qanoq nutarsarnissaannik suliarujussuarmik aallartitsivoq:

- Isumaginnnnermi siunnersortit meeqqamik suliassanngortumik tigusigaangamik suleriasissaannik najoqutassanik tamarmik pisussaffiinik, pinngitsoornatik aqqusaagassaannik, suliaqarluta aallartitsivugut, Aqqaluaq B. Egede oqarpoq nangillunilu:

- Taamaaaliunngikkutta, ullumikkutut inissisimaqattaarneq, ukiuni kingullerni ajornartorsiutaasoq, utikattuassooq. Taamaammat aaqqiinivimmik ujartuinissaq, aamma Inatsisartut kingusinnerusukkut akulerutsinneqarnissaat siunertaralugu taamatut suliamik aallartitsivunga.

Aningaasarpassuarnik naleqassasoq

Aqqaluaq B. Egede tamatuma saniatigut meeqqanik isumaginninnermi ajornartorsiuterpassuarnik qanoq aaqqiinissamik aningaasaqarnermut naalakkersuisoqarfimmeersut allaffigalugit oqaloqatiserai. Isumaginnittoqarfiimmi sulianik taamaattunik suliarinninnermik ilisimasaqarluartussaalatsinerannik suliaasalu kukkuneqangaatsiarnerannik ajornartorsiutinik aaqqiinissaq aningaasarpassuarnik naleqartussaassaaq:   

- Aningaasarpassuarnik naleqartussaavoq, meerarlu qitiutikkaanni allatut ajornaqaaq pisortaq kiffartuussinerat nutaamik nalilersortariaqarpoq. Aamma sulisut aalajaatsut pissarsiarineqassappata pisortani kommuninilu suliffigissaaneq uagut akisussaaqataaffigilertariaqarparput, Aqqaluaq B. Egede oqarpoq nangillunilu:

- Arlaatigut kommunit nukittorsaavigineqassappata politikkikkut isummerfigissavarput.

Ajornartorsiutilli aaqqinneqariaannaanngillat. Aningaasartorfiussaqippat tamaanngikkaluarpalluunniit. Namminersorlutik Oqartussallu akisussaasuuleraluarpataluunniit ajornartorsiutit kisimiillutik aaqqissinnaanngilaat. Oqartussaasunimmi arlalinnit aaqqitassaammat kivitseqatigiittoqarnissaa pisariaqarpoq:

- Politikkikkut isummerfigineqartariaqarpoq. Inuiaqatigiittut isummerfigisariaqarparput. Nalilersuiffigisariaqarparput inuttut ataasiakkaatut, taamatut inissinneq pisortaniinnaanngimmat aammali meerartallit inooriaasiannik aallaaveqartorujussuulluni. Taamaammat taanna ataatsimoorluta suliassarput uanga naalakkersuisutut suliarilerpara.

Pisariaqarmanuna uparuaasoq

Ombudsmandip ukiumoortumik 2022-mi nalunaarusiamini saqqummiussaminik suliat, ingammik meeqqanik isumaginninnermut tunngasut, kukkuneqaqinissaat ukiorpassuarni ilimasuutigereerlugu kommunit isumaginnittoqarfiisa suliaat misissuiffigimmagit, tamanna oqallisaalerpoq.

Taassuma kommunit marluk taamungaannaq toqqarlugit misissuiffigai, meeqqallu allamut inissitaatinnatik oqaloqatigineqaqqaarsimanngitsortaqartut suliallu ilaanni aalajangiinerit allagaataanngitsut misissuinerani erserpoq – tassa tamatuminnga immikkut ilisimasallit oqarnerat naapertorlugu inatsisinik unioqqutitsisoqartarpoq.

Taamaammat Ombudsmandi ukiorpassuarni ilimasuutigisaminik timitarsiinerminik kinguneqartumik tamatumani misissuissalluni aalajangersimammat Aqqaluaq B. Egedep aamma nuannaarutigaa:

- Ombudsmandi uanga ilaliinnarusuppara. Pisariaqarmanuna upaaruaasoq. Taamaammat pisariaqarpoq taanna aaqqissammat aamma politikerit tamanna -  kommuniniikkutta, inatsisartuniikkutta Naalakkersuisuniikkuttaluunniit -  suliassaq tigullugu passullugulu isummersorfigisariaqarparput, Aqqaluaq B. Egede oqarpoq.