Allamut inissiinerit toriitsut: Kommuni ajornartorsiornini nassuerutigalugu ikioqqusoq

Qeqqata Kommunia meeqqanik isumaginninnermi sulianut tunngasuni ukiuni arlaqartuni angummanniapilooreerluni suliassat taakku nammineerluni nammassinnaanagit nassuerutigalugu Namminersorlutik Oqartussanut maanna ikioqquvoq.

Allattoq Kim Hinrichsen

juunip 22-at 2023 07:26

Nutserisoq Marie Kûitse Kristensen

- Ilungersunaqaaq. Isumaginninnermut siunnersortinik amigaateqarneq ilungersunartuusoq nalunngilarput.

Qeqqata Kommuniata atugarissaarnermut ataatsimiititaliaata siulittaasua, Juliane Enoksen, taama oqarpoq.

Qeqqata Kommunia kommunit Ombudsmandip misissugassaasa aapparaat. taannalu nunatsinni kommunit isumaginninnermi ilisimasaqassutsimik amigaateqarneranik assersuutissatsialaavoq.

OMBUDSMANDIP MISISSUINERA

Ombudsmandi kommunit meeqqanik inissiisarneq angerlartitsisarnerlu pillugit suliaanik misissuivoq.

Ombudsmandi misissuinerminut tunngavilersuummini ima allappoq: "Kommunit meeqqanik inissiisarneq angerlartitsisarnerlu pillugit suliaannik arlaleriarlunga misissuisareerpunga. Misissusarninnilu paasisakka kommunit tamatumani suleriaasiannik isornartorsiuininnut tunngaviukkajupput."

Ombudsmandenip misissuiffigisassatut taamungaannaq toqqagai tassaapput Kommune Kujalleq aamma Qeqqata Kommunia. Sulianillu arlalinnik misissoqqissaagassaminik kommunit taakkua marluk toqqaaqquai.

Tassa kommunit taakkua sulianik misissugassaminik qulinik meeqqanik 2020-p 2021-llu inissiinermut tunngasunik taavalu sulianik allanik aamma qulinik meeqqanik 2020-p 2021-llu akornanni angerlatitsinermut tunngasunik toqqaaqquai.

Suliat misissugassatut toqqakkat katillutik 30-upput.

Kommune Kujalleq aamma Qeqqata Kommunia suliat misissugassatut toqqakkatik pillugit Ombudsmandip nalunaarutaanut missingiummut oqaaseqaateqarnissamik periarfissinneqarsimappput.

Allisiguk

Inatsisit malillugit pisussaaffiusumik oqaloqatiginnittarneranik meeqqanillu allamut inissiisarnermut aalajangiinernik allakkianik amigaateqartoqarpoq. Taamatullu sulianik suliaqarneq atorneqarsinnaanngitsoq, immikkut ilisimasallit oqarput.

Sineriak tamakkerlugu ajornartorsiutaasoq

Taamatut inissisimaneq ilungersunartuusoq, Juliane Enoksenip nammineerluni oqaatigaa. Ajornartorsiornerli kommunini allani aamma ajornartorsiutaasoq, taanna oqarpoq.

- Uagut kisitta ajornartorsiutiginngilarput, sineriak tamakkerlugu ajornartorsiutaavoq. Isumaginninnermut siunnersorterpassuarnik amigaateqartoqarpoq. Aamma Qeqqata Kommuniani, Juliane Enoksen oqarpoq.

ALLAMUT INISSIISARNERIT PILLUGIT ALLAASERISAT NANGEQATTAARTUT

Una allaaserisaq allamut inissiisarnerni suliat naammaginanngitsumik suliarineqartartut pillugit KNR-ip nangeqattaartumik allaaserisaasa ilagaat. KNR.gl, radioaviisi aamma Qanorooq sapaatit-akunnerini tulliuttuni malinnaavigiuk.

Aamma atuaruk: Ombudsmandi: Allamut inissiinerit affaasa missaanni aalajangiinerit allagaataanngitsut

Ombudsmandip misissuereernerata kingorna kommunini pappialarsornerni ajornartorsiutinik aaqqeeqataasussanik kingoraartaasunik sulisoqalerput, maannamulli suli iluatsitsiviunngitsumik. Sulimi kinguaattooqqaqaat.

Aamma atuaruk Peqatigiiffik: Namminersorlutik Oqartussat inunnik isumaginnittunik annaassiniaasariaqartut

Isumaginninnikkut suliassat oqimaatsut suliarineqarnissaannut isumaginninnermut siunnersortitut ilinniarsimasunik suliarinnittussanik amigaateqartoqartoq, ilisimasallit sulianullu ilisimasaqarluartut arlaqartut oqarput.

Namminersorlutik Oqartussat ikiuuttariaqartut

Qeqqata Kommuniani kingoraartaasunik sulisoqaleraluarlutik suli ajornartorsiungaatsiarput.

- Ulluinnarni angumeriniagassaqartangaarmat uippakajaaqqajaanarsisarpoq. Taamaammat allannissamut ilaatigooriarluta malinnaasinnaasanngilagut, Juliane Enoksen oqarpoq.

Aamma atuarukMeeqqanik akuersissuteqaqqaarani angerlarsimaffiup avataani inissiinerit quliniit qulingiluat annertuunik kukkuneqartut Isumaginninnermi Naammagittaalliuteqartarfiup paasigaa

Sulisussaaleqineq ajornartorsiutaanerpaavoq, isumaginninnermut siunnersortiniinnaanngitsunik. Tamannalu peqqutaalluni kommunit ajornartorsiornerminnut ikioqqullutik politikerit iliuuseqarnissaat maanna piumasaraat, oqimaaqatigiinnerusumik ingerlasinnaalernissaq anguniarlugu.

- Sineriak tamakkerlugu isumaginninnermut siunnersortit amigaataapput. Tamanna Naalakkersuisut peqatigalugit eqqartoqqittariqarparput. Uagut kisitta ajornartorsiutiginngilarput. Sineriak tamakkerlugu ajornartorsiutaavoq, taamaammat kommunit qitiusuminngaanniit ikiorneqarnissarput arlaleriarluta oqaatigisarparput, taanna oqarpoq.

Kommune Kujallermi Isumaginninnermut Ataatsimiititaliap siulittaasua, Sofia Olsen, tamatumunnga tunngatillugu oqaaseqarumanngilaq.

Nutaarsiassami kukkunermik nassaarsimaguit uunga allaffigineqarsinnaavugut.