MIO: Meeqqat pillugit suliat kommunit kivissinnaanngikkaat nassuerutigisariaqarparput

Ombudsmandip kisitsit saqqummiussaasa takutippaa allamut inissiinissamik naliliiniartilluni suliat tunngavilersorneqarneri amigaateqartut. Kommunellu ingerlatitsivinni ukiut arlallit angummassinnanngereersoq, Namminersorlutik Oqartussat akisussaaqataanissaq pillugu iliuuseqartariaqartoq, MIO-p meeqqat illersuisuat, Aviâja Egede Lynge isumaqarpoq. Taamaanngippat meeqqat sumiginnassavagut.

Allattoq Apollo Jeremiassen

juunip 23-at 2023 07:20

- Isumaqarpunga una ajornartorsiut ima angitigisoq, maanna nassuerutigisariaqaripput kommuninit inatsisit malinnissaat aammalu meeqqat pisinnaatitaaffiisa malinnissaat artoraat.

Angerlarsimaffiit avataannut kommunit inissiisarnerini uppernarsaatit amigartarneri tamassumalu kinguneranik suliamut pilersaarusiortoqartannginnera pillugu, Meeqqat illersuisuat, Aviaaja Egede Lynge oqarpoq.

- Meeqqat pillugit pilersaaruteqartoqannginnera ukiorpassarni eqqartoreerparput. Aamma nalunngilarput pilersaarutit taakku atuutsinnagit meeqqap illersornissaa, qanoq ikiorserneqarnissaa ineriartornissaannullu pisinnaatitaaffii pisinnaaneq ajortut nalunngilarput.

Aamma atuaruk Ombudsmandi: Allamut inissiinerit affaasa missaanni aalajangiinerit allagaataanngitsut

Kommunit meeqqat pillugit sullissineranni innuttaasut naapertuilluarnerunngitsumik sullinneqarnertik pillugu MIO-mut maalaarutinik anngussiartut amerlapput. Ukioq manna maalaarutaanerpaallutik meeqqanik angerlarsimaffiup avataanut inissiinerni tamassuma allakkatigut takussutissaqartannginneri.

ALLAMUT INISSIISARNERIT PILLUGIT ALLAASERISAT NANGEQATTAARTUT

Una allaaserisaq allamut inissiisarnerni suliat naammaginanngitsumik suliarineqartartut pillugit KNR-ip nangeqattaartumik allaaserisaasa ilagaat. KNR.gl, radioaviisi aamma Qanorooq sapaatit-akunnerini tulliuttuni malinnaavigiuk.

Aamma atuaruk: Ombudsmandi: Allamut inissiinerit affaasa missaanni aalajangiinerit allagaataanngitsut

Tamannarpiarlu ajornartorsiutaanerpaasoq, Aviaaja Egede Lynge isumaqarpoq. Inatsisinik tamanna uniuineruinnanngitsoq aammali FN-ip meeqqat pillugit isumaqatigiissutaata unioqqutinneqartarneranni meeqqat ilaginnarneqartartut taanna oqarpoq:

Aamma atuarukOmbudsmandi: Qeqqata Kommunia ilungersunaqisunik qasseeriarluni kukkusarsimavoq

- Meeqqat tamakkiisumik inuiaqatigiinnit suminginnarneqartut taakkuupput angajoqqaanngortussat. ajhoralkuartumillu inerisimalerlutik meeqqaminnik suminginnaanissamut qanittut. Taamaammat uumma ajornartorsiutip siunissaq ungasissoq eqqarsaatigalugu kaaviiaaginnarsinnaanera takorloorsinnaavara.

Namminersorlutik oqartussat iliuuseqartariaqarput

Meeqqat angerlarsimaffiup avataanut inissinneqartarneri kommuninit pitsaasumik suliarineqartannginneri kommunit manninneerlutik paasisariaqaleraat Aviaaja Egede Lyngep naqissuserpaa. Siunnersuutigalugulu suliaq tamanna Namminersorlutik Oqartussanit akisussaaffigineqalertariaqartoq, taamaaliornermi kommunit ikiorneqarsinnaallutik:

- Periarfissat ilagisinnaavaat suliassanik ukuninnga kivitsisinnaasumik aalajangersimasumik peqatigiiffiliorneq imaluunniit sullissivimmik pilersitsineq. Kommunemut attuumassuteqanngitsumik. Taamatut suleqatigiinneq immaqa Namminersorlutik Oqartussat aqqutigalugit pilersitsisoqarsinnaavoq.

OMBUDSMANDIP MISISSUINERA

Ombudsmandi kommunit meeqqanik inissiisarneq angerlartitsisarnerlu pillugit suliaanik misissuivoq.

Ombudsmandi misissuinerminut tunngavilersuummini ima allappoq: "Kommunit meeqqanik inissiisarneq angerlartitsisarnerlu pillugit suliaannik arlaleriarlunga misissuisareerpunga. Misissusarninnilu paasisakka kommunit tamatumani suleriaasiannik isornartorsiuininnut tunngaviukkajupput."

Ombudsmandenip misissuiffigisassatut taamungaannaq toqqagai tassaapput Kommune Kujalleq aamma Qeqqata Kommunia. Sulianillu arlalinnik misissoqqissaagassaminik kommunit taakkua marluk toqqaaqquai.

Tassa kommunit taakkua sulianik misissugassaminik qulinik meeqqanik 2020-p 2021-llu inissiinermut tunngasunik taavalu sulianik allanik aamma qulinik meeqqanik 2020-p 2021-llu akornanni angerlatitsinermut tunngasunik toqqaaqquai.

Suliat misissugassatut toqqakkat katillutik 30-upput.

Kommune Kujalleq aamma Qeqqata Kommunia suliat misissugassatut toqqakkatik pillugit Ombudsmandip nalunaarutaanut missingiummut oqaaseqaateqarnissamik periarfissinneqarsimappput.

Allisiguk

Aallaqqaatitulli pisariaqarpoq politikerit akisussaaffimik tigusinissaat, ilaatigullu tamanit paasineqarnissaa aaqqiissutinik sukkasuunik ajornartorsiutit aaqqinneqarsinnaanngitsut, kisiannili ungasissoq eqqarsaatigalugu aaqqiissutissanik pisariaqartitsisoqartoq:

- Uanga politikerinik maqaasisaqarpunga qunusuitsunik aamma nassuersinnaasunik. Politikki salliunnangu suna pineqarnersoq salliussisinnaasunik iliuuseqarusullutillu aalajangiisinnaasut. Meerartagummi pineqarput pineqarani kikkut qanoq isumaqarnesut aamma partii qanoq qalipaateqarnersoq kikkullu qinersinermi ajugaassanersut. Meerartattaana siunissaat uani pineqartoq.