Kujataa sikorsuaarukkiartulilertoq

Kujataa aasaq manna pisarnerminngarnit sikorsuaqarneroqaaq. Taamaannerata Kujataata imaa angallaffigiuminaallisillugulu Danmarkimi silasiorfiup DMI-p sikunik alapernaarsuisui ulapaarnerutippai.

Kujataali sapaatit akunnerata tulliani sikorsuaarukkiartulissasoq, DMI-p sikuni alapernaarsuisuineersup Jens Jakobsenip ilimasaarutigaa.

- Kujataa sikorsuaarukkiartulerpoq. Tamaani sapaatit akunnerata siuliani sisamanngornermi tallimanngornermilu kippasimmut saqisartumik avanningaatsiarpoq. Sikorsuit taamaalillutik silavariartulerput. Sapaatit akunnerata tulliani sikorsuaarutikanneriarpat umiarsuit takornariartaatit Nanortalimmut Qaqortumullu tulassinnaalissapput, taanna oqarpoq.

Tassa Kujataani angallanniartut sikorsuaarutilerpasimmat eqqissiallassinnaanngorput.

Royal Arctic Line nioqqutissanik pajuttuisartuusoq sikorsuarnit ajornartorsiortitaasunut ilaavoq, aamma Kujataani takornarialerisut. Takornarialerisummi umiarsuit takornariartaatit sikorsuarnik akornuteqarlutik tikinngitsoortarmata suliassaalatsipput.

Aamma nannunik sikorsuaarukkiartornerani Kujataanut tikiuttoqakulassaassasoq ilisimagineqarpoq.

Anoraasammat sikorsuaqarneroqisoq

Maannamut suli sikorsuaqarneroqinera qaqutigoorluinnartuusoq, DMI-meersut oqaatigaat.

Sikorsuit aasaqqammiinnartoq aakkiartulereersimasaraluarput, aasaq mannali taamaaqqajanngilaq. Anoraasannera taamaanneranut pissutaassangativikkitsik, Jens Jakobsen oqarpoq.

- Taamaalinerani Islandip nalaani naqitsiniisaffeqangaatsiartarpoq, taava sikorsuit kangiarlutik aattarput Nunap Isualu uianngitsoorlugu. Upernaarli aasarlu manna anoraasappoq. Taamaammat Kujataa maannamut suli sikorsuaqarpoq, taanna oqarpoq.

Sikorsuit Kujataa uiarlugu Kitaani Paamiut eqqaannut upernaaq aasaq mannalu anguttarsimasut, qaammataasiamit assilisani DMI-p nittartakkamini Facebookiminilu saqqummiussaani erserpoq. Assi © : DMI

Silap pissusiata allanngoriartornera pissutaasoq nalaatsornerinnaasorluunniit?

Silap pissusiata allanngoriartornerata kinguneri nunatsinni malugineqarsinnaalereertut qularineqanngilaq.

Taamaanneralu Avannaata Kitaani aamma ersippoq, sila allanngorarnerullunilu kingusinnerujartuinnartumik annikinnerujartortumillu sikusalerluni.

Taamaammat Kujataata sikorsuaqangaatsiarnera silap pissusiata allanngoriartorneranik pissuteqartoq ilimageqqajaanarpoq.

- Aasaq manna allanartumik anoraasammat maannamut suli sikorsuaqarnera nalaatsornerinnaasoraara, Jens Jakobsen oqarpoq.

Silalli pissusiata allanngoriartornera taamaanneranut pissutaaqataalluarsinnaasoq, taanna aamma oqarpoq. Tamannali qularnaarniarlugu anorimik silamillu uuttuinerit sukumiisumik nalilersornissaat pisariaqarpoq.