Kujataani piniartoq: Ukiuni 50-ini aatsaat taama sikorsuaqartigaaq
Nunatta kujataani kangianilu sikorsuit suli uumisaaripput.
Sikorsuit ukiuni kingullerni piffissap imaalinerani ajornartorsiutaajunnaartaraluartut ukioq manna taamaanngilaq. Taamaattoqartarneralumi qaqutigoortuusoq kujataani piniartoq, Hans Levisen oqarpoq.
Taassuma ukiuni kingullerni 50-ini taama sikorsuaqartiginikuunngitsoq oqaatigaa.
- Eqqaamavara 1970-ikkut aallartilaarnerani sikorsuit nunap isuaniit avammut 100 sømilit oqaatigaat isorartutigisut avammut. Tassa kingorna aatsaat taama aammalooqqilluni taama sikorsuaqartigeqqilerpoq, piniartoq Aappilattumeersoq, Hans Levisen oqarpoq.
Sikorsuaqarneranilu pissutsit allarujussuusarnerat Hans Levisenip aamma nalaatinngilaa.
- Taavalu aamma sikorsuaqannginnera aamma nalaattarnikuuarput, sikorsuaqanngivissortarpoq ilaanni, taanna oqarpoq.
Suli qaammatip ataatsip missaa
Ukioq manna sikorsuit kujataani februaarip qaammataanili takkusimaarnerat arlalippassuartigut kinguneqareerpoq.
Nioqqutissanik pajuttaatit Qaqortumi upernaaq uninngaannaleraluarput. Sinersortaat Sarfaq Ittuk sapaatip akunnerata uuma siuliani Nanortalimmukartussaagaluarluni Qaqortumut killiinnarpoq.
Umiarsuit takornariartaatit piffissap imaalinerani tikillattaalereertaraluartut ukioq manna sikorsuit pissutaallutik suli aamma tikittoqanngilaq.
DMI-p sikunik alapernaarsuisarfianit, Hans Henrik Lightip oqarnera naapertorlugu ukiup taamaalinerani sikorsuaqangaatsiarnera aamma nalinginnaasuunngilaq.
- Eqimattaakkuutaarlutik amerlasoorujussuit Nunap Isuata eqqaaniit Nunarsuit tungaanut, Paamiullu tungaanut siaruaassimapput, taanna oqarpoq.
Piniartup, Hans Levisenip sikorsuarnik alapernaarsuilaartartup nunatta kangiata tungaani anoreqarnerunera pissutigalugu sikoqangaatsiarnerarpaa.
- Taamaappoq, akuttuvoq taama inissittarneq, ukiorpaalunni ilaanni takkusimaangeriarlutik taama takkusimaartarput.
Hans Levisenip silasiortullu Hans Henrik Lightip juulip naanissaanut sikorsuaqarnissaa eqqoriarpaat.
Sikorsuit nalinginnaasumik ukiuni kingullerni juunip aallartilaarnerata tungaanut kujataani takkusimaartaraluarput.
