Manniit akimikkut unammillersinnaassapput

Narsami kukkukuuteqarfimmik aappagu aasakkut pilersitsisoqarpat illoqarfimmi manniit qaammammut pisariaqartinneqartut 40.000-it nioqqutigineqalernissaat piareersarneqarpoq.

Kukkukuuteqarfimmik pilersitsinissaq 3 mio kr.-nik akeqassasoq siullermik naatsorsuutigineqarsimagaluarpoq. Massakkullu nutaamik neqeroortoqarneratigut pilersaarut akikinnerulissasoq Narsap kommuneani inuussutissarsiornermut siunnersorti Carl Egede Høegh oqarpoq, oqaatigisinnaanginnerarpaalu qanoq akeqassanersoq pilersitsiniarneq. Massakkullu neqeroorutimik takkuttoqarneratigut inuup ataatsip ingerlatsisinnaanera takorloorneqarpoq, tamannalu akikinnerussasoq oqaatsigineqarluni. Aallartisarnermilu pisortat aningaasatigut tapersersuinissaat naatsorsuutigineqarpoq.

-Neriuppugut pisortat tungaaninngaaniit suaarutigineqarnikuuvoq avataaninngaaniit tikisittakkagut annikilliartortinneqarnissaat sulissutigineqassasoq. Qanittukkullu inatsisartut inuussutisarsiutit siuarsarniarlugit pilersissimasaaat kisitsisaatigut naamassiniariarlugit saqqummiussiffigissavagut, neriuutigaarpullugu taamaassasoq, Carl Egede Høegh oqarpoq.

Pisisussani Pilersuisoq Brugsen-ilu soqutiginnillutik nalunaaruteqareersut aamma oqaatigineqarpoq. Nunatsinnilu atortorissaarutit pitsanngoriartormata siunissaq ungasinnerusoq eqqarsaatigalugu nunatta avanarpasinnerusortaani kukkukuuteqarfinnik pilersitsisoqarsinnaanera Narsamiit aamma aqunneqarsinnaasasoq ilamagalugu Narsap kommueani inuussutissarsiornermut siunnersorti oqarpoq.

Kukkukuup mannia ataaseq 1,20 kr.-eqassasoq naatsorsuutigineqarpoq, Danmarkimi akiusumiit allaaneruallaasanani.