Ilisimatooq akitsuutit pillugit: Akisunerulersitsineq peqqinnerulersitsisinnaavoq
- Akisunerulersinneqaraangata atuinnginnerulertoqartartoq pillugu uppernartunik paasissutissaqarpoq, Naalagaaffiup Innuttaasut Peqqissusaannik Misissuisoqarfianit immikkut ilisimasalik Christina Larsen oqarpoq.
AAMMA ATUARUK Tupatortartut imigassartortartullu ikinnerummata nunatta karsia amigartooruteqarpoq
Akitsuutinut Inatsisartunit ataasinngormat akuersissutigineqartunut isornartorsiuisorpassuugaluarput. Inuit 1000-it missaanniittut akitsuutinut akerliussutsimik Nuummi sapaatit akunnerata siuliani takutitsipput, peqatigiiffiillu akitsuutinut isornartorsiuisorujussuupput.
Arlallit peqqinnanngitsunik Naalakkersuisut aningaasanut inatsisip oqimaaqatigiisinniarlugu akitsuutinik qaaffaammata atuinnginnerunissartik qularalugu KNR-imut oqarput.
- Akitsuutit nutaat malillugit cigaretsit 20-t 82 koruuniniit 86,50 koruuninut akitsorput.
- Sioraasat kilo aamma taamatupajaaq akii qaffapput: 21,95 koruuniniit 26,50 koruuninut.
- Carlsbergi ataaseq 18,50 koruuniniit 19,25 koruuninut akeqalerpoq.
- Aamma mamakujuttut akisunerulerput:
- Mamakujuttut puussiaaqqat Haribomeersut, 375 grammit, 65 koruuniniit 67 koruuninut akitsorput.
- Aamma sukkulaatit mikinerit tamarmik 50 øremik akitsorput.
- Brugsenimit paasissutissat
Inuusuttulli ingammik akinik qaffaanernit sunnerneqartartuusut, Christina Larsen oqarpoq.
Tamtumunnga inuusunnerusut tamakkunnnga ileqqupiloqalivissimannginnerat sunneruminarnerunerallu peqqutaavoq.'
Taamaammat misissuisarfiup akitsuutit taperserpai.
- Tamanna inuusuttut ikinnerusut pujortartalertarnerannik, inuusuttut ikinnerusut imertalertarnrannik isumaqartoq taavalu pujortartarlutillu imertartut peqqinnarnerusumik pissuseqalertartut nalunngilarput, Christina Larsen oqarpoq.
Sukkunik atuineq marloriaatinngorsimasoq
Aamma sukkut akitsuusernissaat isumatusaarnerusoq, Christina Larsen oqarpoq.
- Sukkut atorneqartut ukiuni kingullerni qulini marloriaatinngorsimasut innuttaasunik misissuinernit takutisinnaavarput, innuttaasullu peqqissusaat eqqarsaatigalugu sukkut ukkatarineqarnissaat pingaaruteqarpoq, Christina Larsen oqarpoq.
- Sukkut atorneqartut ukiuni kingullerni qulini marloriaatinngorsimasut innuttaasunik misissuinernit takusinnaavarput,
Akitsuutilli kisimiillutik innuttaasut peqqinnerutilerneq ajoraat, taassuma erseqqissaatigaa. Aalakoornartumik cigarettinillu atuineq malunnaatilimmik appartinneqassappat, suliassaqarfinni arlalinni pinaveersaatitsinermik suliniuteqartoqartariaqarpoq.
AAMMA ATUARUK Sikaritsinik tupanillu akitsuineq peqqinnissaqarfimmut oqilisaassisinnaasoq
Nunatsinniittut 52 procentii ulluinnarni pujortartartut 4 procentiilu ilaannikkut pujortartartut innuttaasunik siorna misissuinerup takutippaa.
Nunatsinniittut 52 procentii ulluinnarni pujortartarput.
Naallu nunatsinni cigarettit akisunerugaluartut, Danmarkimiittut 23 procentiinnaat pujortartartuupput.
Christine Larsen oqarpoq, Danmarkimilu cigarettinut akitsuutit qaffannissaannut akerliusut nunatsinni tupa akisunerugaluartoq pujortartartut amerlanerannut innersuusuutigisaraat.
Akilli qaffasissusaannaasa pujortartarneq allanngortinneq ajorpaa. Akilli allanngornerat immini pujortartartunik ikinnerulersitsisartoq taanna nassuiaavoq.
- Qanoq akeqarnersut apeqqutaatinnagu akisunerulernerat atorneqarnerannut sunniuteqartarpoq. Amerlanerusut ingammillu inuusuttut akornanni pujortartarunnaartarput, inuusuttullu ikinnerit pujortartalertarput. Taamaalilluni Kalaallit Nunaanni akitsuusiineq sunniuteqarumaartoq naatsorsuutigaara, naak tupat akisoreeraluartut, Christina Larsen oqarpoq.
Aamma Aningaasaqarnermut siunnersuisoqatigiit peqqinnissaqarfimmut oqilisaassisinnaasoq oqaatigereerpaat.
