Tupatortartut imigassartortartullu ikinnerummata nunatta karsia amigartooruteqarpoq
Suliffissaaleqinerup akiorniarneqarneranut aningaasartuutit amerlasimapput. Aningaasaqarnermut naalakkersuisuugallartoq Vittus Qujaukitsoq taama nassuiaateqarpoq.
- Nunatta karsiani amigartooruteqarnissaq inatsisartut ukiakkut ataatsimiinnerani ilimasaarutigereernikuuarput, tupanut imigissanullu akitsuutit aamma akileraarutitigut isertitakinnerunissaq pissutaalluni. Taavalu aamma isertitassatut naatsorsuutigineqartut nikeriaateqarnerat tassuunakkut amigartooruteqarnissaq ilimagisiariaqartoq, Vittus Qujaukitsoq oqarpoq.
Aamma atuaruk Vittus Qujaukitsoq: Nunatta karsia amigartooruteqassaaq
Vittus Qujaukitsoq siullermik Inatsisartut aningaasaqarnermut ataatsimiititaliaagallartumi ilaasortamit Naaja Nathanielsenimit, kingornalu Sulisitsisut Peqatigiifiannit, piumaffigineqarnermi kingorna nassueruteqarpoq nunatta karsia 2014-imut missingersuusiornermit annertuumik amigartooruteqarumaartoq.
Isertitsissuteqartussatut missingersuusiunneqarput imigassanit akitsuutit 215 millioner koruuninik isertitsissutigineqartussatut, kisiannili naatsorsuutigineqartumit pujortartartut imigissamillu atuisartut ilimagisamit ikinnerupput, aningaasanik immikkut ilisimasaqartut siulittuinerannit.
Aamma atuaruk GA-p Vittus Qujaukitsoq akissuteqaqqugaa
Vittus Qujaukitsup oqarnera malilugu akileraarutinit isertitsissutigineqartussatut nunatta karsia 910 millioner koruuninik siulittuutigineqarput.
Allatut oqaatigalugu innuttaasut taama aningaasatigut isertitaat aningasaqarnermut naalakkeruisoqarfimmi ilimagineqartutut amerlatiginngillat. Tamannalu pissutigalugu akileraarutitigut isertitat ikinnerupput.
Naalakkersuisut suliffissanik pilersitsiniarnerat akeqarsimavoq
- Suliffissaaleqinerup immikkut ittumik akiorniarneqarneranut suliniut upernaaq inatsisartut aalajangiiffigisimasaat 174,2 millioner koruuninik aningaasartaqartoq pissutigalugu, nunatta aningaasaqarneranut toqqaannartumik toqqaannanngitsumillu sunniuteqartussaavoq, Vittus Qujaukitsoq oqarpoq nangillunilu:
- Kisianni aningaasat suliffissaaleqinermut akiuniarnermut atorneqartussaammata, inuiaqatigiinni sulilersitsiniarnermi annertuumik kinguneqartussaammat tamatuma tungaanut ernumasaarinissamut pissutissaqanngivippunga.
