Maariu Olsen nersorneqarpoq
Kalaallinik filmiliortartunik sisamassaanik nersornaasiisoqarpoq.
Nunatsinni filmiliornermik ingerlatsisut peqatigiiffiata Film.gl-ip nersornaataa Innersuaq Maariu Olsenimut eqqaaniutitut ippassaq unnukkut tutsinneqarpoq.
Isiginnaartitsisartoq erinarsortartorlu Maariu Olsen 57-nik ukioqarluni siorna novembarimi toqukkut qimaguppoq.
Maariu Olsen 1980-kkunni isiginnaartitsisartutut naammassivoq. isiginnaartitsisartuni Silamiuusimavoq nipilersuuterpassuillu peqataaffigisarsimallugit.
Filmiliarineqarnerinit eqqaamaneqarnerupput Otto Rosingip filmiliaa Nuummioq, kingusinnerusukkullu Ben Stillerip torrallataani The Secret Life of Walter Mittymi annikittumi pingaarutilimmilli peqataanera.
Maariu Olsen Nunatsinni filmiliornermi malunnaateqarluarsimaneranut pikkoriffippassuinullu nersorniarneqarpoq.
Film.gl-ip siulittaasua KNR-imut paasissutissiivoq.
- Maariu isiginnaartitsisartut silarsuaanni maligassiuivoq. Kalaallit filmiliarpassuini inuttaasarpoq inuttaaffinilu uppernartuuilersittarlugit, soorlu taamaattussaq. Nunarsuup ilaanni isiginnaartitseqataaffini kalaaliussusermik qalipaasertarpai, Pipaluk K. Jørgensen oqarpoq.
Maariup soraluaa Mette Poulsen ikinngutaalu Mooqqu, Simon Løvstrøm, Maariu Olsen sinnerlugu nersornaammik tigusisuupput.
Nersornaasiuttagaq Innersuaq assiliisartumut filminillu qiortaasartumut Ulannaq Ingemannimut siorna tunniunneqarpoq.
