Múte B. Egede: Angallannermik matusinermit allaanerusunik iliuuseqarsinnaavugut
Coronavirus nunatsinni tuniluunnerulinnginnissammat, nunarput avataaneersunut matusariaqartoq isumaqartorpassuaqartoq inuit internettikkut attaveqaqatigiiffiisigut takuneqarsinnaavoq. Coronavirusimillu tunillatsissimasut nunatsinniittut qanittukkut aatsaat taama amerlatigimmata, ernumasoqartoq paasisinnaallugu Naalakkersuisut siulittaasuat, Múte B. Egede (IA), oqarpoq.
- Paasilluarsinnaavara. Angallanneq coronap atuunnerani ataasiaannarna matusariaqarlugulu sukannersumik iliuuseqarfigisariaqartarnikuugatsigu, Múte B. Egede KNR-ip radiokkut aallakaatitassiaanit Aasarpalaamut oqarpoq.
Inissisimanerput siornamit allaanerusoq
Coronavirusimik siorna tunillatsissimasoqaqqaartalermat, Naalakkersuisut Nuummit aallartoqarsinnaajunnaartitsipput, kingullertigullu Sisimiuni Qaqortumilu ungasinngitsukkut aallartoqaqqusaajunnaarsitsipput.
AAMMA ATUARUK Nuuk matuvoq: Nalunaaqutaq 16:00-imiit ima ilioqqusaanngilatit
Pissutsilli massakkut allanngoriartormata, nunatsinnik matusinermit periarfissat amerlanerusut, Múte B. Egedep erseqqissaatigaa.
- Siornaminngaanniit allaanerusumik inissisimaffipput, innersuussaqartuniit tassaatinneqarpoq, nunatsinni akiuussutissamik kapitissimasut massakkut ima amerliartupiloortigimmata, illersorsinnaanerput annerusoq. Taamaalillutalu aamma angallanneq tamakkiivissortumik matunngikkaluarlugu allatut aaqqiigallarnerit iliuusaasinnaasarlutik, Múte B. Egede oqarpoq.