Múte B. Egede 2021-mi unammilligassanut angusanullu: Uranimik inerteqquteqalerneq attortissutigaara

Ukioq 2021 Múte B. Egedemut assigiinngitsunik angusaqarfiuvoq.

Inuit Ataqatigiinni taanna siulittaasutut aprilimi qineqqusaaqqaarnermini Naalakkersuisunut siulittaasunngorpoq - Naalakkersuisuni siulittaasuusimasuni inuusunnerpaanngorluni.

Siulittaasoq 34-nik ukioqartoq nunatsinni siuttunngornerminiilli politikikkut pisoqarfioqisumi aquttuuvoq.

Naalakkersuisuni ilaasortat marluk tunuarput, Atassut naalakkersuisoqatigiinnut tapertaajunnaarpoq, naalakkersuisoqataasoq Naleraq aamma aalassatsitsillattaalluni.

- Naatsorsuutigisinnaanngisatsinnimmi politikip silarsuaani pisoqarsinnaasarmat, Múte B. Egede oqarpoq.

- Aalaakkaasumik ingerlatsiniarnermi takorloorsimanngisat unammillernartut takkutseriasaarsinnaasarput. Naalakkersuinikkullu taamatut inissisimaffigisatsinni unammilligassat takkuppata qanoq aaqqeriarnissai qaangeriarnissaallu sulinissaq anersaaralugu pingaarnerpaamik ingarlasariaqartoq.

AAMMA ATUARUK Asii Chemnitz Narup trækker sig som naalakkersuisoq for finanser

Isummat assigiinngitsut Naalakkersuisut Inuit Ataqatigiillu siulittaasuattut naaperiartinniartariaqartarneri unammillernarnerpaasut taanna oqarpoq.

- Pingaanerpaaq unammilligassallu annerpaatut suliassaasoq tassaavoq isummat assigiinngitsut naapisinniarnissaannut anersaaqarluni sulisariaqarneq, oqarpoq.

- Taassumallu saniatigut takorloorsimanngisat aamma takkuteriataartarnerisigut nutaanik suliassanik aaqqiisariaqarnermut piareersimasariaqarneq ingerlariaqqinnissallu qanoq ittuusariaqarneranik sulisariaqarneq aamma taannaavoq unammilligassani takkuttartoq.

Utoqqarnut millionilikkaanik aningaasaliineq angusanut pingaarnernut ilaasoq

Sunali ukioq manna angusani pingaarnerpaava?

Utoqqaat atugaat pitsanngorsaaviginiarlugit aappaagumut aningaasanut inatsimmi 15 millionit koruunit aningaasaliissutaanerat nunatsinni siuttuni inuusunnerpaap toqqarpaa.

- Utoqqaat atugaannut pitsanngorsaanissamut alloriarneq aningaasanut inatsimmi partiiniit tamakkiisumik taperserneqarnera alloriarneq taanna angusatta pingaarnersarigaat isumaqarpunga, Múte B. Egede oqarpoq.

AAMMA ATUARUK Urani naaggaaraat: Inatsisartuni akuersisut amerlanerussuteqaqqalaartut

Angusap taassuma saniatigut uranitalimmik piiaaqqusinngilluinnarnerup atuutseqqilernera angusani pingaarnerni ilaasoq siulittaasoq oqarpoq.

- Angusaavoq annertooq uagutsinnut, taamaattorli aamma kinguaassatsinnut inuiaqatigiit nunatsinni minguitsumik ineriartorlutik aammalu kinguaassatsinnut nuna minguitsoq atorluarsinnaasassaat siulitta uagutsinnut kingornutassanngortissimasaat najugarissammassuk.

Nammineq Narsami peroriartorami suliaq immikkuullarittuusoq oqarpoq. Kuannersuarni aatsitassamik uranitalimmik piiaaffissaq Narsap eqqaaniippoq.

- Attortisimanarpoq. Suliaq aamma sivisunikuugami akerleriiffiulluni annertuumi inuiaqatigiit partiillu akornanni.

Inuiaqatigiit tusarnaagassaraagut

Ukioq kingulleq assigalugu coronavirusi nunatsinni tuniluuppianngilaq. Ukioq mannali illuatungerluinnaannik pisoqarpoq.

- Coronap ulloq manna tikillugu unammillertuarpaatigut. Qaangeriartulersutut inissikkaangatta ineriartoqqissimalluni nutaamik tuniluutilerlunilusooq inissittarpoq. Maannalu taanna nunarsuatsinni nalaapparput.

AAMMA ATUARUK Nakorsaaneq: 2022 naallugu, immaqalu sivisunerusumik, corona eqqartussavarput

Coronavirusimi sineriatsinni tuniluutilerneranit. Mútep Naalakkersuisut siulittaasuattut, Naalakkersuisut siuliinut sanilliullugu, saqqumilaanngippallaarnerarlugu ilaatigut isornartorsiorneqarpoq. Taanna pillugu ima oqarpoq:

- Saqqumilaarnissamik inuiaqatigiit noqqaassutigippassuk taannaavoq Naalakkersuisut aamma tusarnaagassaat, 00:04:15Múte B. Egedep oqarpoq.