Nakorsaaneq: 2022 naallugu, immaqalu sivisunerusumik, corona eqqartussavarput
Sapaatip akunnerata kingulliup ingerlanerani oqaaseq ”Omikron” amerlanerit tusarpaat.
Tassami taannaammat corona-p allannguutaasa kingullersaat, maanna sukkaqisumik tuniluutilersoq, nunarsuatsinni tamani virusimut Delta-mut tuniluunnerpaatut paarlattaasussaatut inissittussatut, nappaatit tuniluuttarnerannik immikkut ilisimasallit, virologit allallu ilisimatuut ilimagaat.
Taassumalu Nunatsinni arlaatigut tuniluutilernissaa aamma ilimanarluni.
Coronap allannguutaanik nutaamik maanna malinnaaqqissaartoq, nakorsaaneq Henrik L. Hansen, taamatut naliliivoq.
- Coronap allannguutaata arlaannik Europami tuniluuttoqaleraangat, qanorluunniit ilioraluarutta, sapaatip akunnerisa arlaqanngitsut ingerlaneranni aamma Nunatsinni tuniluutilertartussaavoq, taanna oqarpoq.
Taassuma aarlerinartoqarneranut takussutissaqanngilaq
Kalaallit Nunaannili Omikron tuniluutileruni qanoq aarlerinartigissava?
- Maannakkuugallartoq ilisimasat naapertorlugit taassuma annertuumik imaluunniit allatut aarleqqutaanissaanut pissutissaqanngilaq. Coronamut akiuussutissat taassuminnga tunillatsittut napparsimanerujussuanngorneranni akiuussutaasinnaanersut, maanna annertuumik oqallisigineqarpoq, nakorsaaneq nassuiaavoq.
AAMMA ATUARUK Nakorsaaneq: Qasigiannguani tuniluunneq unitsissinnaavarput Upernavimmiunngitsorli
Tamatumunngali naliliinissaminnut immikkut ilisimasallit suli ilisimasaat annikippallaarput, Henrik L. Hansen naqissusiivoq:
- Taamaammat suli iliuuserisassatut pilersaarutaavoq, sapinngisamik amerlanerpaat akiuussutissamik kapitinnissaannut neqerooruteqarnissaq. Misilittakkammi tamarmik takutippaat, nunat amerlanerpaanik akiuussutissamik kapitissimasunik innuttallit aamma taakkuusut coronap akiorniarneranik oqinaarinerpaasut.
Amerlanerit kapitinnissaat neriuutigaa
Kalaallit Nunaanni innuttaasut suli 10 procentimik amerlanerit akiuussutissamik kapitinnissaat, nakorsaanerup kissaatigaa.
- Taava Kalaallit Nunaat pitsaanerusumik inissisimalissaaq. Maannakkummi erseqqissivoq, akiuussutissinneqaraangatta tassa qaangiisalertussatut isumaqarnikuunerput. Nunalli tamat akorngini pisut naapertorlugit tamanna eqqortuunngitsoq nassuerutigisariaqarparput, Henrik L. Hansen oqarpoq nangillunilu:
- Ukioq 2022 naallugu, immaqalu suli sivisunerusumik, corona eqqartussavarput. Taamaammat siunissami Kalaallit Nunaata pitsaanerusumik inissisimanissaa anguniarlutigu, sapinngisamik amerlanerpaat akiuussutissamik kapitittarnissaat pisariaqarluinnarpoq.
