Tasiilarmiut naammatsittut: Ajortumik eqqartorunnaarniartigut!

Tasiilami meeqqat pingasuugaangata ataaseq kinguaassiuutitigut kannguttaatsuliorfigitissimasarpoq, meeqqallu marluugaangata aappaa kommuunimi isumaginnittoqarfimmi sulianut ilaasarluni. Isumaginninnikkut ajornartorsiutit tusagassiuutitigut allaaserineqartut taakku ilamineerannguaraat, Tasiilarlu eqqartorneqartillugu ajornartorsiutaannaat pineqartarneri Tasiilarmiunut iliuuseqarusussuseqartitsipput.

- Naqissuserneqaqattaarpugut ornissalluta tujorminartoq, ersinartoq. Taanna arlalinnit malugereerparput, Gert Ignatiussen oqarpoq.

AAMMA ATUARUK Martha Abelsen: Ikiuilertupallattartussat Tasiilamukaatipallassavagut

Tasiilami ajornartorsiutit allaaserineqartareerput, piviusulersaarusiarli "Byen hvor børn forsvinder" upernaaq aallakaatinneqareersorlu oqallinneq aatsaat taama annertutigaaq.

Gert Ignatiussen: - Maanimiut misigisimavugut soorlu orninneqarnissatsinnut ersinartuusugut. Isumannaallisakkamik ineqartillugit aatsaat maaniittoqarsinnaasoq.

Piviusoq poortorniarsarinngikkaat

Ajornartorsiutit iliuuseqarfiginiarlugit sulissutit aallartinneqartut innuttaasunit akerlilerneqarnianngitsut Gert Ignatiussenip oqaatigaa. Piviusorlu poortorneqarniarsarinngitsoq, Tasiilamiliuna ajunngitsut aamma eqqartorneqartarnissaat siunertarinerarlugu.

-Tasiilaq tunulu nuanniitsuinnarnik misigisaqarfiunngilaq aamma nunatta sinnerani allatuullu maani inuuvugut nuannersorpassuarnik aqqusaagaqartarluta, nuannersorpassuarnik misigisaqartarluta misigisaqartitsisarluta.

Tasiilamimi nuannersorpassuaqartoq taanna isumaqarpoq tamannalu tusagassiuutit eqqartussallugu puiorsimavaat. Tasiilaarlu nuanniitsuinnartut nittarsaallugu.

- Soorlu kitaamiunit ilaatigut aperineqartarpugut: "Ersiginngilisiuk maaniinnissarsi?". Tassa avataaninngaanniit taama naqissuserneqareertarpugut.

"Orninneqarnissatsinnut ersinartuusugut"

Tasiilaq eqqaalu pillugu politiit nalunaarusiaat qaammatip siuliani saqqummertup tunup isigineqarneranut aamma iluaqutaavallaanngilaq. Meeqqat kinguaassiuutigut kannguttaatsuliorfigineqarsimasut ukiui agguaqatigiisillugu aqqaniliupput. Nalunaarusiap saqqummereernerata kingorna Tasiilap illoqarfittut ikinngutaata Gentoftip atuartut paarlaaqatigiillutik atuariartornerini ilaqutariinni najugaqartarunnaassasut aaliangerneranik kinguneqarpoq.

AAMMA ATUARUK Forældre i Tasiilaq: Vi er skuffede over, at Gentofte-børn ikke skal bo hos os længere

- Maanimiut misigisimavugut soorlu orninneqarnissatsinnut ersinartuusugut. Isumannaallisakkamik ineqartillugit aatsaat maaniittoqarsinnaasoq, Gert Ignatiussen oqarpoq.

Tasiilami akerliussutsimik takutitsineq aqagu nalunaaqutaq ataatsinut aallartissaaq.