Ole Larsen killeqarfilerngusaattut qanittuani najugaqarpoq
Thailandip Cambodiallu killeqarfilerngusaannerat sakkortusivoq. Kalaallit Nunaanneersup Thailandimut najugallip qanimut malinnaanera pillugu KNR-ip apersorpaa.
Ole Larsen nunatsinneersuuvoq, Thailandimi maanna najugaqarluni.
Allattoq Mads Lynge, Steve Pedersen Hinrup
decembarip 21-at 2025 10:00
Thailandip Cambodiallu killeqarfilerngusaannerat sakkortusimmat, Danmarkimi nunanut allanut ministereqarfiup nunanut taakkununnga angalaniartunut inassutini marlunngormat sukaterpaa.
Ole Larsenip, Kalaallit Nunaanneersup, killeqarfilerngusaanneq qanimut malinnaavigaa.
- Aallaqqaammut stressernartorujussuuvoq, aatsaat taamaattumik misigisaqarluni. Juulimi aamma taamaaligamik. Taamani sivikikkami, taava massakkut sakkortunerujussuuvoq aammalu tusartakkavut sakkortunerullutik, Ole Larsen, nunatsinneersoq, Thailandimilu massakkut najugalik oqarpoq.
Taanna Thailandip kangisissuani Cambodjamut killeqarfimmut 16 kilometeritut qanitsigisumi, tassalu ornissallugu inassutaanngitsumi, inooqateqarpoq.
Sivitsortumik killeqarfilerngusaattut
Thailand Cambodjalu Cambodjap namminersulernerata kingorna 1950-ikkunnili killeqarfilerngusaattarput .
Buddhistit naalaffiannik Preah Vihearimik piginnittussaaneq pillugu Thailand Cambodjalu taamanikkut aporaattalerput. Preah Vihear UNESCO-p nunarsuarmi kingornussassatut allattorsimaffianiippoq, tamannalu pillugu killeqarfilerngusaanneq piffissami kingullermi sakkortuseqqilluni:
- Suli Sorsupput, suli tusaavagut, kisianni oqarsinnaavunga sungiutiinnanngikkutsigu eqqissisimaneruvugut. Qaartartut qanillineq ajoramik. Aallarteqqaaramik sapaatit akunnera siulleq sakkortoorujussuarmik qanillisaramik, Ole Larsen oqarpoq.
Nunat marluk taakku killeqarfik pillugu aporaannerat piffissami kingullermi sakkortuseqqippoq, Ole Larsenillu oqarnera naapertorlugu qaartartut tusarsaapput:
- Tuppallattarput, ungatitsinni, tusaasorujussuuagut, najugaqarfigisatta qilaa qillertoraminiugami suli ilaanni sajupiluttarpoq, tupattarpugut, Ole Larsen oqarpoq.
Thailand Cambodjalu killeqarfilerngusaateqqilermata Ole Larsenip najugaqarfigisaata nalaani inuit amerlasuut qimaapput, ilaalli maanna utersimalereerlutik:
- Angerlarnikuunngillat amerlanerpaat, kisianni ilai angerlanikuupput, aamma qimarnguik ullut qulissaat najoreerlugu ilaat qasugamik, kalaaleq, Ole Larsen Thailandimiit oqarpoq.
Angerlarsimaffinniinnissannut annilaangavit?
- Annilaanganngilagut aamma maani qimaaffissaqaratta, taanna naggasiivoq.
