Martha Abelsen: Ikiuilertupallattartussat Tasiilamukaatipallassavagut
- Danmarkiminngaanniit ikiuutissatut akuersissutigineqartut soorunalimi qujamasuutigisorujussuuagut,
isumaginninnermut naalakkersuisoq Martha Abelsen oqarpoq.
Danmarkip naalakkersuisui 5,3 millionit koruuninik tapiissuteqarneri peqqissutsimut isumaginninnermullu naalakkersuisup Martha Abelsenip qujamasuutigaa. Tasiilami meeqqat kinguaassiuutitigut atornerlugaasimasut aningaasanik tapiissutinit ikiorneqartussanngorlutik.
Tapiissutit isumaginninnermi siunnersortinut, tarnip pissusiinik ilisimasalinnut misissuisartunullu taamatuttaaq ilaqutariinnut sullissisartunut atorneqassasut, Meeqqat nunamilu namminermi pissutsit pillugit ministeri Astrid Krag taama ilisimatitsissuteqarpoq.
Pinerlunnerit unnerluutigineqarsimasut arfineq-pingasoriaammik amerlanerusut
- Kalaallit Nunaanni kinguaassiutitigut pinerlunnerit unnerluutigineqarsimasut Danmarkimi Savalimmiunilu pinerlunnernut unnerluutigineqarsimasunut sanilliullugit arfineq-pingsoriaammik amerlanerupput.
- Tasiilap inuttussusaa eqqarsaatigalugu meeqqanut inuusuttunullu kinguaassiutitigut pinerluttuliornernut tunngatillugu Kalaallit Nunaanni unnerluussinerpaaffiusarpoq.
- 2018-imi pinerlunnerit unnerluutigineqarsimasut 27 proccentii Tasiilami meeqqamik 15-iliineqanngitsumik kinguaassiutitigut atoqateqarnermut tunngapput, massa Kalaallit Nunaata inuisa kinguaassiutitigut atornerlunneqarsimasut 5 procentii Tasiilameersuusut.
Danmarkip ikiuineratigut Tasiilami meeqqat inuusuttullu navianartorsiortut ikiorneqassasut, isumaginninnermut naalakkersuisup Martha Abelsenip oqaatigaa.
- Tasiilami aallartissaagut Kommuneqarfik Sermersooq peqatigalugu. Taavalu sukkanerpaammik inuit taakkua Danmarkimiit katiterneqarsinnaasut, Tasiilamut tikippata Tasiilami sulisut suliassanik ingerlatitsissapput, Martha Abelsen oqarpoq, taassumalu nassuiaappaa tapiissutit 5,3 millionit kooruuniusut Tasiilamut ukioq manna atorneqassasut.
Tasiilami suliat ikilippata kommuninut allanut qanoq allannguisoqarsinnaaneranik suliat misilittakkallu aallaavigalugit misissuisoqassaaq.
AAMMA ATUARUK Kommunit Danmarkimut sulisunik, inissanik ilinniarsimasunillu ikioqqusut
- Kommunit sinneri aamma ikiorneqarnissamik kissaateqarnikuummata, qanoq suleriaaseqarluta kommunit sinneri kaajallassanersutigit tikikkumaarparput. Aallaavittut Tasiilami aallartissaagut, Kommuneqarfik Sermersooq peqatigalugu, Martha Abelsen oqarpoq.
Ukiuni tallimani kingullerni pinerlunnerit unnerluutigineqarsimasut Tasiilami meeqqat inuusuttullu kinguaassiutitigut pinerluttuliorfigineqarsimasunut attuumasssuteqartut 191-iusut Kalaallit Nunaanni Politiit sapaatit akunnerani uani nalunaarutigaat.
Tassa imaappoq, ukiut tamaasa pinerlunnernik nutaanik 40-nik unnerluutiginnittoqartarpoq – sumiiffimmi 2000-ngajannik inulimmi.
Ingammik niviarsiaqqat quliniit 14-it angullugit ukiullit eqqugaasarput, pinerlussimasutullu unnerluutigineqartut angutaakkajupput 15-iniit 30 angullugit ukiullit. Pinerluttuliorfigineqarsimasut pinerluffigineqarnerminni ukiuisa agguaqatigiisinnerat aqqanilliupput.
