Epsteinimut tunngasut saqqummiunneqartut: Bill Clinton assini arlalinni ilaasoq

Toqqortat hunnorujukkaat pisoorsuarmut toqukkut qimagussimasumut kinguaassiutitigullu atornerluisimasutut eqqartuussaasimasumut Jeffrey Epsteinimut attuumassuteqartut saqqummiunneqarput.

Inatsiseqarnermut ministereqarfimmit taama tallimanngornermi ilisimatitsisoqarpoq.

Toqqortaatigineqartuni ilaatigut videonik assinillu imaqartuni tusaamasarpassuit ilaasut erserpoq.

USA-p præsidenterisimasaa Bill Clinton toqqortaatigineqartuni assinilu arlalinni takussaavoq.

Nutaarsiassaqartitsiviit AFP Reutersilu taama allapput.

Bill Clinton 1993-imiit 2000-mut præsidentiuvoq.

Reutersip allaaserinninnera naapertorlugu, assit ilaanni Clinton naluttarfimmi Ghislane Maxwell ilagigaa takuneqarsinnaavoq. Taassuma  Epstein suleqatigalugulu ukiorpassuarni inooqatigivaa.

Naluttarfimmi assilineqartumi inuuk alla kiinaali isertuunneqarluni assersorneqarsimasoq takuneqarsinnaavoq.

Assillu ilaanni præsidentiusimasoq inuk allaagunavissoq ilagalugu isertuussilluni aamma kiinaanik assersorneqarsimasumi boblebadertut takuneqarsinnaapput.

Timmisartuaqqamik nammineq pigineqartumik Clinton arnamik aammali taassuma kiinaa isertuunniarlugu asserneqarsimasumik ilaaqateqartoq, AP allaaserinnippoq.

Atorfillit pisortaat: Assit ukiunik 20-nik pisoqaassuseqarput  

Inatsiseqarnermut ministereqarfimmit assit qanga assilineqarsimaneranik paasissutissiissutigineqanngilaq. Epsteinip atornerlussimasaanit præsidentiusimasoq atornerlueqataasimanermut pasillerneqanngilaq.

Clintonip siuliani Epsteinimut atassuteqartarsimanerani ajuusaarutigalugu oqaatigaa, Epsteinilli pinerluttarsimaneranik ilisimasaqarani ilanngullugu oqaatigaa.

Angel Urena Clintonip atorfilittaasa pisortaat, X-imi assit pillugit oqaaseqarpoq. Assit ukiunik 20-nik pisoqaatigisut taanna allappoq.

- Bill Clintonimut attuumassuteqanngillat, attuumassuteqanngisaannarput, attuumassuteqalinngisaannassappullu.

-eqimattat marluk matumani pineqarput. Eqimattami siullermiittut Epsteinip pinerluutaanik ilisimasaqanngillat, pasitsaassisoqarmalli ungalassimaarpaat. Eqimattap aappaani ilisimaarinnittoqalereersoq attaveqarneq attatiinnarneqarpoq, taanna oqarpoq.

Epstein aamma Trump

Reutersip allaaserinninnera naapertorlugu, suliani misissorneqaleruttortuni Clintonip assinganik avammut saqqummiussuineq, Inatsiseqarnermut ministereqarfiup politikkianik unioqqutitsineruvoq.

USA-p maanna præsidentiata republikanerineersup Donald Trumpip, Clintonip qanoq Epsteinimut attuumassuteqarnera Inatsiseqarnermut ministereqarfimmit misissorneqartussanngorlugu suliakkiutigereerpaa.

Trumpip nammineq Epsteinimut attaveqartarsimanerata ukkatarineqannginnissaanik misiliisoq, isornartorsiuisartut isumaqarput.

Trump aamma Epstein 1990-ikkunni 2000-llu aallartisimalernerata nalaani assilineqarsimasuni takussaapput. Trumpip oqarnera naapertorlugu 2000-kkut qiteqqunnerata nalaani attaveqarnini kipisimavaa, præsidentillu Epsteinip pinerluttarsimaneranik maannamut ilisimasaqannginnerarpoq.

Toqqortaatigineqartut saqqummiunneqarneranni Trumpip oqaluuserineqarpiannginnera eqqumiittuusoq, Reuters allappoq. Epsteinip najugaqarfiani Trumpip atuakkiaa atuakkat ilisivianniittoq assit ilaanni ersippoq, Epsteinip checkiugunavissoq paarigaa, tassanilu Trumpip aqqa allassimasoq assit ilaanniippoq. 

Inatsiseqarnermut ministereqarfimmit paasissutissiissutigineqartut naapertorlugit, quppernerit allat avammut sapaatip-akunnerini tulliuttuni marlunni saqqummiunneqarumaarput.

/ritzau/