Gentoftemit meeqqat ilaqutariinni najugaqaqqusaajunnaarnerat pakatsissutigigaat

Meeqqat Gentoftemeersut Tasiilami ilaqutariinni paarlaaqatigiinnikkut najugaqartassanngitsut Gentofte Kommune Tasiilami meeqqanik kinguaassiuutitigut annertuumik pinerlunnerit oqallisigineqarata kingorna aalajangerpoq.

Tamanna Tasiilami angajoqqaanit pakatsissutigineqarlunilu ajuusaarutigineqarpoq.

- Soorunami oqaasissaaleqinarpoq. Ajuusaarnaqaaq, nalunarporluunniit qanoq qitornatsinnut oqassanerluta inersimasut allat taamannak pissuseqartarnerata kinguneranik uagutsinneeqqusaajunnaarnerat ajuusaarnaqaaq, Ingrid Pilanat Angenold oqarpoq.

AAMMA ATUARUK Pinerliisoqartareersoq: Meeqqat Gentoftemeersut Tasiilami ilaqutariinni najugaqaqqissanngitsut

Taassuma ernera qulinik ukiulik septembarimi Gentoftemiippoq. Aamma Martin Fontain Gentoftemeeqqammersumik ernilik qitornaminut paasititsinissaminut qilanaarnani oqaluttuarpoq.

- Qatanngutersiami maanga tikinnissaanut qilanaalereernikuugami, aperereernikuullunilu tikippat sumiissanersoq. Nalunnginnakku uagutsinniissinnaasoq oqarfigereernikuullugu uagutsinniissasoq. Nukappiaraaterpullu takorluuilereerluni, Martin Fontain oqarpoq.

- Assut pakatsinarpoq, aamma paasitinnissaanut. Misigissutsikkut eqqarsaateqarnalaarpoq, Martin Fontain oqarpoq.

AAMMA ATUARUK Tasiilami atuarfiup pisortaa: - Uggornarpoq paasinarlunili

Aamma Ingrid Pilanat Angenoldip ernera tikeraartoqarnissaminut qilanaalereeraluarpoq.

- Tikikkamili qilanaarilerpaa tikeqqanissaa, uagutsinniittarnissaa. Eqqartortalereerlugu taamannak saqqummiisoqarnera soorunami ajuusaarnarpoq, Ingrid Pilanat Angenold oqarpoq.

Tasiilami kinguaassiutitigut pinerlunnerit ukiuni kingullerni tallimani nalunaarutigineqarsimasut 191-iusut politiit nalunaarusiaanni qanittukkut saqqummiunneqartumi allaqqavoq. Meeqqallu Tasiilami ilaqutariinnut najugaqartinnissaat Geftoftemi angajoqqaani eqqasuttoqassasoq paasisinnaallugu Ingrid Pilanat Angenold oqarpoq.

AAMMA ATUARUK Aalajangernerput allat eqqasuuteqarnerannik tunngaveqanngilaq

Gentoftemili angajoqqaat isumaginninnermilluunniit suliallit eqqasunngitsut, Gentofte Kommunelli nammineq eqqasunnera meeqqat Gentoftimeersut Tasiilami ilaqutariinni najugaqartarunnaarnissaannut aalajangernermut pissutaavoq.

Ilaqutariillu tikeraartoqarusuttut Gentoftimit tikeraartoqannginnerani misissuiffigineqaqqaartarnissaat aqqutissaasinnaagaluartoq Ingrid Pilanat Angenold isumaqarpoq.

- Aamma angajoqqaarpassuaqarami tamaani ajunngitsumik ingerlasut. Soorunami aamma taakkua qularnanngitsumik ajuusaarsimassaqaat, Ingrid Pilanat Angenold oqarpoq.

Taanna aamma Martin Fontain meeraallutik Gentoftemiipput tikeraartoqarlutillu, taamannalu qitornaminnut misigitikkusukkaluarlugu oqarput.

Gentoftimit Tasiilamut atuariartortut atuarfimmi vandrehjemmimiluunniit najugaqatigiittalissapput.

AAMMA ATUARUK Borgmesteri Tasiilaq pillugu: Toqqissisimanermik maanna pilersitsiniarsarissaagut