Borgmesteri Tasiilaq pillugu: Toqqissisimanermik maanna pilersitsiniarsarissaagut

- Taama nalunaaruteqartoqarnerani soorunami ataqqivarput, aamma allanngortinniarsinnaanngilarput.

Kommuneqarfik Sermersuumi borgmesteri, Charlotte Ludvigsen (IA) Gentoftep Kommuniata meeqqat atuartut Tasiilamiinneranni angerlarsimaffinni unnuisittarunnaarniarlugit nalunaaruteqarnerani ullormi tassani oqarpoq.

- Pitsaanerpaavoq uani meeqqat toqqissisimasumik inissisimanissaat, Charlotte Ludvigsen oqarpoq.

Gentoftep Kommuniata meeqqat atuarfianni 5. klassimi atuartut illoqarfimmut ikinngutigisaminut 1990-imiilli Tasiilaliartittalerpai. Danskit meerartaat Tasiilami angerlarsimaffinni inissinneqartaraluarput, Tasiilamili meeqqat kinguaassiutitigut kannguttaatsuliorfigineqarsimasut pillugit oqaluttuat qassiiusut saqqummereerneratigut Gentoftep Kommuniata danskit meeqqat atuartut angerlarsimaffinni najugaqartarunnaarsippai.

Tasiilami meeqqat kinguaassiutitigut atornerlunneqartarsimasut amerlangaatsiartut piffissami kingullermi ukkatarineqangaatsiarnerat pissutigalugu taama aalajangertoqarpoq. Kalaallit Nunaanni Politiit nalunaarusiaanni nutaami Tasiilami meeqqanut inuusuttunullu kinguaassiutitigut atornerluinerit nalunaarutigineqartut 2014-imit 2018-imut 191-iusut saqqummersinneqarpoq.

AAMMA ATUARUK Kalaallit meerartaasa ikiorneqarnissaat, akissarsiat assigiit nunattalu sammineqarnera

Meeqqat qulinit 14-inut ukiullit annermik eqqugaasarput, pinerluuteqartullu tassaanerusarlutik angutit 15-init 30-nut ukiullit. Pinerliffigineqartoq pinerliffigineqarnermi nalaani agguaqatigiissillugu aqqanilinnik ukioqartarpoq.

Tasiilami eqqaanilu 3000-ngajannik inulimmi ukiumut agguaqatigiissillugu politiinut nalunaarutiginninnerit 40-sarnerat matuma assigaa.

- Ilisimasaqanngitsuusaarnissaq ajornakusoorpoq. Taamaammat angerlarsimaffinni najugaqartitsisarnitta ingerlatiinnarnissaanut aalajangersimaannassanngilagut, Gentoftep pisortaanera, Torben Frølich Radio24Syv-imut oqarpoq.

Torben Frøliship Charlotte Ludvigsenillu oqarnerat naapertorlugit meeqqat paarlaasseqatigiinnikkut tikeraartarneranni ukiuni 30-ngajanni kinguaassiutitigut atornerluisoqarneranik suliaqarnikuunngilaq, najugaqartitsisarnermilu ernumanartoqarnikuunani.

Aalajangiineq tamanut naqissusiissanngitsoq

Kommuneqarfik Sermersuumi borgmesterip Tasiilami ilaqutariinnut suliffinnullu pissutsit pitsanngorsarnissaannut suliniuteqartoqarnerarpaa.

Borgmesterip Gentoftep aalajangerneranit allaanermik takutitsisoqarsinnaanissaa neriuutigaa.

- Neriuttorujussuuvunga Tasiilaq tamarmi taama naqissuserneqassanngitsoq. Ilaqutariippassuaqarmat ingerlalluartunik.

Taamaammat Gentoftelu atuartunik paarlaasseqatigiittarnerup ingerlaannarsinnaanissaa aamma pingaaruteqarpoq.

AAMMA ATUARUK Pinerliisoqartareersoq: Meeqqat Gentoftemeersut Tasiilami ilaqutariinni najugaqaqqissanngitsut

- Meeqqat avitseqatigiittarnerat, ingammik kulturikkut oqaatsitigullu eqqarsaatigalugu taanna ingerlaannarnissaa kissaatigisorujussuuvarput, borgmesteri oqarpoq.

Gentoftemit atuartut ikittartussat pillugit kommune aaqqiissutissarsiortoq, Charlotte Ludvigsen oqarpoq.

- Unnuiffigineqarsinnaasartumik kommunimiit massakkut nassaareerpugut.

Tasiilaq Gentoftelu 1990-imili illoqarfittut ikinngutigiilerput atuartunillu paarlaasseqatigiittarnissamut isumaqatigiissuteqarnikuullutik.