Meeqqanik 5. klassemi atuartunik 30-t missaaniittunik Gentoftemiit Tasiilamut ukiut tamaasa paarlaaqatigiinnikkut 1990-imili atuariartortoqartarpoq.Assi: Merete Lindstrøm, KNR

Tasiilami atuarfiup pisortaa: - Uggornarpoq paasinarlunili

Gentoftimi atuartut Tasiilamut paarlaasseqatigiillutik atuariarnerini ilaqutariinni najugaqartarunnaarnissaat Tasiilami atuarfiup pisortaata uggoraa. Tasiilamiinnerminni kalaallit ulluinnaat misigisaannut ilaasarmat.

Uggornarpoq - paasilluarsinnaavarali.

Tasiilami Alivarpimmi atuarfiup pisortaa taama qisuariarpoq.

Gentofte Kommuniata ukiut 30-t kingulliit meeqqat 5. klassit 30-t missaanniittut Tasiilamut paarlaaqatigiillutik atuariartortittarpaat. Qallunaajaqqat Tasiilami ilaqutariinni najugaqartarput, Tasiilamili meeqqanik kinguaassiuutitigut atornerluisoqartarnera nutaarsiassatigut ukkatarineqangaatsiareersorli meeqqat ilaqutariinniittarunnaassasut Gentoftip Kommuniata aalajangiuppaa.

AAMMA ATUARUK Pinerliisoqartareersoq: Meeqqat Gentoftemeersut Tasiilami ilaqutariinni najugaqaqqissanngitsut

Gentofte Kommunemi pisortaaneq Torben Frølich Radio24syvimut taama oqarpoq.

Gentoftemiit Tasiilamut atuariartortut atuarfimmi vandrehjemmimiluunniit najugaqatigiittalissapput.

- Ukiut 30-t suleqatigiinnerput ingerlalluarsimasoq, aammalu sakkortuunik misigisaqarfigipilunneqarnikuunngitsoq ajuusaarnarpoq unitsinneqalermat. Aappaatigullu aamma paasilluarsinnaallugu aallakaatitassiaq taanna "Byen hvor børn forsvinder" takoreerlugu ersilersimassappata paasilluarsinnaavara, Tasiilami Alivarpiup pisortaa Nukannguaq Kristiansen oqarpoq.

Suliat nutaat ukiumut 40-t

Tasiilami nunaqarfiinilu ukiuni tallimani kingullerni meeqqanut inuusuttunullu kinguaassiuutitigut pinerlunnerit 191-iusut Kalaallit Nunaanni Politiit nalunaarusiaanni atuarneqarsinnaavoq.

Niviarsiaqqat quliniit 14-inut ukiullit pingaartumik pinerluffigineqartarsimapput, pinerluttullu angutit 15-init 30-t akornanni ukioqartuunerupput. Pinerluffigineqartoq pinerluffigineqarnermini agguaqatigiissillugu 11-nik ukioqarpoqut. Tasiilami eqqaanilu 3000-ngajannik inulimmi ukiumut agguaqatigiissillugu politiinut nalunaarutiginninnerit 40-usarlutik.

Gentoftip Kommunia Kalaallit Nunaannilu politiit atuartunik paarlaaqatigiinnermi kinguaassiuutitigut atornerluisoqarsimaneranik nalaataqarsimanatik nutaarsiassaqartitsivimmut Radio24syv-imut oqarput.

AAMMA ATUARUK Tasiilami meeqqanut inuusuttunullu kinguaassiutitigut pinerlinnerit pillugit unnerluutiginninnerpassuit

Paarlaaqatigiinnikkummi Tasiilamukartut kalaallit ulluinnaat misigisaannut ilaasarmata, tamassuma periarfissaajunnaarnissaa, Nukannguaq Kristiansenip uggornarnerarpaa:

- Kalaallini ilaqutariinni inooriaaseq qanoq ittuunersoq misigitikkusuttaraluaratsigu.

Aalajangernerli ataqqivaa:

- Atuarfimminngaanniit toqqaannartumik iliuuseqarfigisinnaannginnatsigit inunnik isumaginnittoqarfimmiikkamik, Nukannguaq Kristiansen oqarpoq.

Piffissap takutikkumaarpaa

Kommuneqarfik Sermersuumi meeqqanut ilaqutariinnullu ataatsimiititaliami siulittaasoq Uju Petersen (IA) taama aamma qisuariarpoq.

- Soorunami uggornartoqarpoq, kisianni ataqqivarput taamatut aalajangersimanerat.

Ataatsimiititaliami arlaatigut iliuuseqarniarpisi?

- Piffissap takutikkumaarpaa qanoq suliaq ingerlaqqinnersoq, Uju Petersen oqarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat