Tasiilami meeqqanut inuusuttunullu kinguaassiutitigut pinerlinnerit pillugit unnerluutiginninnerpassuit
Tasiilami kinguaassiutitigut pinerlunnerit 191-it 2014-imit 2018-imut unnerluutigineqarsimapput.
Niviarsiaqqat qulinit 14-inut ukiullit pingaartumik pinerluffigineqartarsimapput, pinerluttullu angutit 15-init 30-t akornanni ukioqartuunerupput. Pinerluffigineqartoq pinerluffigineqarnermini agguaqatigiissillugu 11-nik ukioqartarpoq.
Kalaallit Nunaanni Politiit nalunaarummi saqqummerseqqammikkaminni uppernarsarlugit saqqummersitaat alianarluinnarput.
Nalunaarusiaq meeqqanut inuusuttunullu 2014-imit 2018-imut kinguaassiutitigut pinerluuteqarnernik erseqqissaaneruvoq. Tassa erseqqissaanermi kinguaassiutitigut ukiuni tallimani kingullerni pinerluuteqarnerupput, taamaammat Tasiilami eqqaanilu ukiut tamaasa ukiumut 40-nik unnerluutiginnittoqartarneranut agguaqatigiissinneqarsinnaavoq. Taamaammat unnerluutigineqarneq ajortut kisitsaat qaffasissorujussuusoq, Kalaallit Nunaanni Politiit ilisimatitsissutigaat.
Innersuussutit 12-it
Politiit nalunaarusiaq tunuliaqutaralugu politiit Tasiilami qanoq iliortariaqarneranik aqqaneq-marlunnik innersuussuteqarpoq:
- Susassaqarfinni suliaqartut akornanni ilisimasanik avitseqatigiinneruneq kiisalu pikkorissaaneq aqqutissiuussinerlu.
- Meeqqat atuarfianni atuartunut nukarlernut, akullernut angajullernullu ilinniartitsissusiorneq.
-Siusinaartumik iliuuseqarnissap ukkatarinera kiisalu angajoqqaat pisinnaasaat aamma angajoqqaat ilaqutariinni inuuniarnermikkut ajornartorsiuteqartuni akisussaaffeqarnerat.
- Tasiilami meeqqat inuusuttullu siunissagissaarnerulernissaannik ukkataqarneq.
- Meeqqanut inuusuttunullu peqqissumik ukiuinullu naleqqumik sunngiffimmi neqerooruteqarnissap pingaarnersiornera.
- Tasiilami imigassamik naleqquttumik atuineq.
- Pinaveersaartitsinermik suliaqarnermi maligassiuisunik peqataatitsineq.
- Tasiilami pinerluuteqarsimasunut katsorsaanissap eqimattakkaarlunilu oqaloqatigiittarnerit amigaataanerat.
- Kalaallit Nunaanni Politiit meeqqanut inuusuttunullu kinguaassiutitigut pinerluuteqarsimanernik unnerluutiginninnernik suliaqartarnerannik pitsannguineq.
- Kinguaassiutitigut pinerluuteqartoqarneranik unnerluutiginninnissamut periarfissanik pitsannguineq.
- Pinaveersaartitsinermik suliniuteqarnerit illoqarfimmi pissutsinut nalinginnaasumik naleqqussarneqassapput.
- Tasiilami meeqqanut inuusuttunullu kinguaassiutitigut pinerluuteqartarnerit amerlanerannut suut allat pissutaasinnaanerannik misissuineq.
Nalunaarusiaq tamaat uani atuarsinnaavat.- Niviarsiaqqat qulit 14-illu akornanni ukiullit pinerluffiunerpaasarnerit tupaallaatiginngilara. Unnerluutiginninnerit politiinit malinnaaffigaagut, taamaammat ataqatigiittut nalunngilarput, Svend Foldager oqarpoq.
Tasiilami meeqqanut inuusuttunullu kinguaassiutitigut pinerluuteqarnerit angerlarsimaffimmi pinerusarput, pinerliffigineqartullu pinerluuteqartoq amerlanertigut nalunngisarereertarpaa.
Unnerluutiginnittut amerlipiloortut
Kinguaassiutitigut pinerluuteqarnerit pillugit 2015-imi unnerluutiginninnerit 13-iinnaapput – unnerluutiginninnerit siorna 56-inut amerlipput.
Naalli unnerluutiginninnerit 2015-imut sanilliullugit maannakkut amerlanerunerat imaanngilaq unnerluutiginninnerit amerlanerusut – unnerluutiginninnerit nutaat amerlasuut ukiut qassiiusut matuma siorna pisuupput.
Kinguaassiutitigut pinerluuteqarnerit pillugit unnerluutiginnittarnerit nalinginnaanerulernikuuvoq.
- Unnerluutiginnittoqartarnera ajunngilluinnarpoq. Taamaaliortoqarneratigummi politiit iliuuseqarnissaannut periarfissatuaavoq. Kinguaassiutitigut naapertuilluanngitsuliorfigisut amerlanerat ilisimallugu unnerluutiginnilluartoqarnera pitsaasuuvoq, Svend Foldager oqarpoq.
Pisimasut affaanni imigassamik atuisoqarsimasoq
Atuarfimmiit kinguaassiutitigut pinerluuteqarnerit pillugit unnerluutiginnittarnerit aamma amerlanerupput. Politiit oqarnerat naapertorlugu Tasiilami atuarfimmi SkoleFemik tassa meeqqanut inuusuttuaqqanullu ikorfartuisartumik meeqqanut piffissaqartitsineq inersimasullu tatigisinnaasaatut oqaloqatigineqarsinnaasoq.
Nalunaarusiap suliarinera ukioq affaata matuma siorna aallartinneqarpoq.
- Tasiilami unnerluutiginninnerpassuit allanit immikkuullarinnerusut takusinnaavagut. Amerlasoorujussuit kinguaassiutitigut pinerluuteqarfiusimasut takusinnaavarput. Taamaammat kisitsisit saqqummersinnissaat uagutsinnut soqutiginartuuvoq, taamaalilluta iliuuseqarnerusinnaassalluta, Svend Foldager oqarpoq.
- Meeqqanut kinguaassiutitigut pinerluuteqarfiusimasunut allannguuteqarsinnaalluinnarsinnaanerput ilimagaara. Suliamik isumaginnittarnerput sukkanerulersipparput. Suliamik isumaginnikkaangata maannakkut sukkanerusumik isumaginnittarpugut – kinguaassiutitigut pinerluuteqarsimanerit suliassanit allanit salliunneruavut, Svend Foldager oqarpoq.
Nalunaarusiami allaaserineqartoq naapertorlugu unnerluutiginninnerit affaanni imigassaq ”taamaallaat” toqqaannartumik akuusarpoq.
