Kunngi Frederik Nuummi: - Suliaqariartunngilanga
Kunngi Frederik naalakkersuisullu siulittaasuat Jens-Frederik Nielsen (D) nuummi allaaqqissuarmi umiatsiamik avalapput.
Avalannginnerini tusagassiortup kunngi apeqquteqarfiginissaanut periarfissinneqarpoq.
Maanna Kalaallit Nunaannukarninnut suna suliariartorpiuk?
- Suliaqariartunngilanga, Kalaallit Nunaannununa angalasunga. Kalaallit Nunaannukarnerit tamaasa nuannariuaannarpara, Nuummilu silagissioqalunga isumaqarpunga, taama Kunngi Frederik DR-imut oqarpoq.
Kingullermik Kunngi Frederik Kalaallit Nunaanniimmat qaammatit aqqanillit qaangiupput. Kunngip nunamut tamaanga uteqqinnera nalaatsornerinnaanngitsoq immikkut ilisimasallit arlallit oqarput.
Amerikap præsidentiata Donald Trumpip, USA-p Kalaallit Nunaat tiguartariaqaraa arlaleriarluni oqartarnera pillugu qajassuussinertut isigisariaqarpoq.
- Kunngip oqaasii tassaapput ‘Ataqatigiinneq, pisussaaffik, Kunngeqarfik Danmark pillugu’. Immaqa Kalaallit Nunaanneersooriarama tamanna qallunaat kunngeqarfianut tamarmut ersersitsinerusutut paasivara, tassa kunngip naalagaaffeqatigiinnik attassisoqarnissaa anguniagaani annerpaasoq. Tamanna tikeraarnermini ersarissaraa isumaqarpunga, taama Nunarput, Issittoq aamma nunat avannarliit pillugit sammisaqarnermi siunnersortip, namminersortup Nauja Biancop ataasinngornermi KNR-imut oqarpoq.
Ataqatigiinneq nukittooq
Naalakkersuisut siulittasuat Jens-Frederik Nielsen (D) ulluni pingasuni Danmarkimeeqqammerpoq. Kunngi Frederik marlunngornermi ullaakkut Nuummut tikeqatigaa.
Taassumalu Kunngi Frederik nunatsinnut tikeraarnera nuannaarutigaa.
Piffissami matumani Kunngip Kalaallit Nunaannut tikeraarnera sumik ersersitsinersoq aperineqarami akivoq:
- Kunngip Kalaallit Nunaannukarusunneranik, Kalaallit Nunaannik nuannarinnilluartuuneranik kunngikkormiut inuiaallu kalaallit akornanni ataqatigiinnerup nukittuujuneranik, sulilu nukittullartuuneranik ersersitsisuusoq isumaqarpunga, Jens-Frederik Nielsen oqartoq DR oqarpoq.
Umiatsiamik angalaareernerup kingorna Kunngi Frederik Katuami kaffillissaaq, tassanilu Nuummiut ilassinnikkiartornissaminnut periarfissaqassapput. Aaqqissuussaq ualimut pingasunut aallartissaaq.
