Immikkut ilisimasalik kunngip tikeraarnissaa pillugu: Ataqatigiinnermik ersersitsivoq

Kunngip naalakkersuisut siulittaasuat, Jens-Frederik Nielsen (D) peqatigalugu ullumi Nuummut tikinnissaat pilersaarutaavoq.

Nunarput, Issittoq aamma nunat avannarliit pillugit sammisaqarnermi siunnersortip, namminersortup, Nauja Biancop oqarnera naapertorlugu kunngip tikeraarnera USA-p præsidentiata Donald Trumpip naalagaaffeqatigiinnut sakkortuumik tatisimanninnerani ataatsimoornermik ersersitsineruvoq.

- Kunngip oqaasii tassaapput ‘Ataqatigiinneq, pisussaaffik, Kunngeqarfik Danmark pillugu’. Immaqa Kalaallit Nunaanneersooriarama tamanna danskit kunngeqarfianut tamarmut ersersitsinerusutut paasivara, tassa kunngip naalagaaffeqatigiinnik attassisoqarnissaa anguniagaani annerpaasoq. Tamanna tikeraarnermini ersarissaraa isumaqarpunga, taanna oqarpoq.

Kunngip tikeraarnera Naalakkersuisut siulittaasuata Danmarkimut ulluni marlunni tikeraarneranut ilaatigut ministeriunermik, Mette Frederiksenimik ataatsimeeqateqarneranik aamma Ataqqinartorsuarmut Kunngimut ilassinninneranut toqqaannartumik ilassutaavoq.

Jens-Frederik Nielsenimut Danmarkimut tikeraarnera pillugu Mette Frederiksen tusagassiuutinut nalunaarummi ima oqarpoq:

- Piffissami ataqatigiiffigisariaqakkatsinni inuuvugut. Nunanut allanut politikkimut pissutsit, Kalaallit Nunaannut kunngeqarfimmullu piffissami matumani ilungersunarneranni immitsinnut tapersersussaagut. Aamma Kalaallit Nunaata Danmarkillu ataqatigiinnerat ineriartortillugulu pitsaanerulersissavarput.

Kunngeqarfiup iliuuserisinnaasani sakkortunerpaaq iliuuserigaa

Trumpip qaninniarneranut atatillugu kunngip qaqugu ilanngutitinneqarnissaa piffissami sivisuumi isumaliutersuutigineqarpoq.

Kunngip Frederiup Kalaallit Nunaat kalaallillu nuannarilluinnarlugit maannamut taamaallaat oqaatigisimagaluarpai.

Thomas Larsenip kunngikkormiut pillugu immikkut ilisimasaqartup aamma kunngikkut pillugit atuakkanik arlalinnik atuakkiortuusup oqarnera naapertorlugu kalaallit naalakkersuisuisa aamma danskit naalakkersuisuisa Danmark Kalaallit Nunaallu qanimut suleqatigiinnerannik ersersitsiniarnermut kunngimik maanna atuiniarnerat isumaliutigilluagaavoq.

- Kunngip Frederiup atorneqarsinnaaneranut aamma amerikamiunut piviusumik aaqqiagiinngilersimanermut atornissaanut piffissanngorpoq. Kunngi Frederik amerikamiup Kalaallit Nunaata Danmarkillu akornanni ersarissumik avissaartuutsitsiniarsarinerani atornissaa periarfissaalluarpoq, kunngikkormiut pillugit immikkut ilisimasalik DR-imut oqarpoq.

Danmarkip nunarput illersoraa

Kunngip tikeraarnera marlunnik immikkoortortaqarpoq. Immikkoortumi siullermi Nuummut tikeraassaaq, tassani naalakkersuisunut ilaasortat nutaat naapissavai. Immikkoortullu aappaani sakkutooqarnermut tunngavoq, tassani nunatta avannaata kangiani sakkutooqarfiit Station Nord aamma qimussimik nakkutilliisut Sirius tikeraassavai.

Nauja Bianco aperigaanni tikeraarnissaata taama pilersaarusiornera nalaatsornerinnaanngilaq.

- Kunngip Nuummut tikeraarnermini kalaallit inuiaqatigiit peqatigalugit takutissavaa. Station Nordimullu angalanermini nunarsuup sinneranut – pingaartumik USA-mut – Danmark sakkutooqarnikkut najuullunilu Kalaallit Nunaannik illersuisoq ersarissassavaa, taanna naliliivoq.

Kunngip Slædepatruljen Sirius tikeraareerunigit Danmarkimut uteqqinnissaa pilersaarutaavoq.