Kosovo namminersortoorusuppoq

Kosovo nunap immikkoortaatut namminersortutut imminut nalunaarutigilersaarpoq, naak Serbia taamaaliornissamut manngertitaaraluartoq, oqarluni, nunami naalakkersuinikkut aaqqissuussineq nutaaq malillugu Kosovo Serbiamut atasoq.

Kosovomi ministeriuneq, Agim Ceku, aviisiliortunut ippassaq oqarpoq, albaniamiut Kosovomit kingoqqisut amerlanersaasa namminersortuunissaq assorsuaq kissaatigigaat, tamannalu serberit akuerinngipassuk isumaqatigiinniarnerit maanna ingerlanneqartut qatangiinnarsinnaasut unnerpaa.

- Sioorasaarutaanngilaq. Periarfissatulli isigaarput. Kosovo tassaalissaaq nuna namminersortoq, ministeriuneq oqarpoq, kissaatigaali Naalagaaffiit Peqatigiit isumannaallisaaniaqatigiivinik isumaqatigiissuteqarnikkut tamanna pissasoq.

Nunap immikkoortaata taassuma siunissaata eqqartorneqarnera Naalagaaffiit Peqatigiit aqqutigalugit februaarimi aallartinneqarpoq.

Kosovo Naalagaaffiit Peqatigiinnit 1999-mili aqunneqalerpoq, sakkutuut serberit pinngitsaalillugit tamaanngaaniit peersinneqarmatali, Kosovoli Serbiamut atasutut pisortatigoortumik suli isigineqarpoq.