Kommune Qeqertalimmi aaqqissuussaaneq atuutiinnassaaq inerisassaarli
Kommune Qeqertalimmi allaffissornikkut politikkikkullu aaqqissuussaaneq maanna atuuttoq atuinnarneqassaaq. Inerisarneqassaarli. Kommunimi suleqatigiilersut isumaqatigiissumminni taama ilaatigut allapput.
Taakkuali qanoq inerisaassanerlutik suli naluaat. Kommunalbestyrelseli nutaaq tamaat peqataatikkusuppaat.
- Uatsinnut soorunami aamma pingaaruteqarnikuuvoq pulaffigalutigu paasisaqarfigissagipput. Tassuunakkut oqaloqatigiinneq aqqutissatut isigaarput. Qanoruna taava iliorluta pitsaanerusumik aaqqissuunniaripput. Imannak allattoqqissaarnikuunngilarput imannaqqinnaaq isikkoqalissaaq, Borgmesteri, Simigaq Heilmann, Demokraatineersoq oqarpoq.
Aningaasartuutaassanersoq suli ilisimaneqanngilaq
Aaqqissuussaanerup inerisarneqartussaanera suli aalajangerneqanngimmat qanoq akeqassanera aamma ilisimaneqanngikkallarpoq.
- Massakkoqqissaaq maana oqaatigisinnaanngilara qanoq naleqarumaarnersoq. Kisianni aana anguniagarput; Sullissineq pitsaasuussappat qanoruna aaqqiigutta ilusilersuillutalu pitsaanerussasoq, Simigaq Heilmann oqarpoq.
Saaffiginnissutit akineqarneq ajortut
Innuttaasunut sullissineq pitsaanerulissappat aaqqissuussaaneq inerisarneqartariaqartoq borgmesteri tunuliaquttanilu isumaqarput. Innuttaasut pisortanut saaffiginnissutaat inatsit atuuttoq malillugu akineqartartussaapput. Tamannali Kommune Qeqertalimmi maanna ilaatigut naammassineqarneq ajortoq, borgmesteri nassuerpoq.
- Qasseriarluta tusarparput mailersimagunik akineqanngitsut, Simigaq Heilmann oqarpoq.
Tamakkua ilaatigut aaqqinniarlugit sulisunik pikkorissaaneq aqqutissatut isigineqarpoq. Innuttaasunullu pitsaasumik sunniuteqarnissaa neriuutaavoq.
- Maannakkut akineqartannginnerat taakkua aaqqikkusuppagut. Taamaammat tassuuna malugineqarnissaa assorujuk kissaatigaara, Simigaq Heilmann oqarpoq.
Borgmesteri: Aaqqissuussaaneq atugarput tulluartuuvoq
Kommune Qeqertalik allaffissornikkut politikkikkullu kommuninut allanut sanilliullugu allaanerusumik ingerlatseriaaseqarpoq. Assersuutigalugu ataatsimiititaliat ataavartut sisamaannaapput kommunimi sanilerisaani, Avannaata Kommuniani, marloriaammik amerlanerusunik ataatsimiititaliaqarpoq.
Kommune Qeqertalimmi ataatsimiititaliat aamma allatut taaguuteqarput. Inua, Inuit, Inoqarfik aamma Timi Tarni.
Tamannalu Kommune Qeqertalimmut suli naleqquttuusorineqarpoq.
- Uanga oqaannarusunngilanga atorsinnaanngilaq nutaamik taarserparput. Ukiut ingerlaneranni ilusilersoriartuaarneqarnikuuvoq, taamaammat isumaqarpunga qangamut uteqqiinnarnissamit, aamma naleqassammat annertuumik, inerisaqqillunguuna qanoq pitsaasumik aaqqissinnaaneripput tassaniiffigivarput, borgmesteri, Simigaq Heilmann oqarpoq.
