Demokraatit, Inuit Aataqatigiit Naleqqallu Kommune Qeqertalimmi isumaqatigiisusiornerat piareeqqajaasoq

Kommune Qeqertalimmi Demokraatit, Inuit Ataqatigiit Naleqqallu isumaqatigiissutissartik naammassilerpaat.

Inuit Ataqatigiinneersoq, Kristian Jeremiassen, KNR-imut taama paasissutissiivoq.

Inuit Ataqatigiit Siumumik suleqateqarsinnaannatik ullaaq manna aamma nalunaarput.

Kommune Qeqertalimmi isumaqatigiinniaqqinnernit pisoqaqqippoq.

Demokraatit, Inuit Ataqatigiit Nalerarlu, ataatsimik amerlanerussuteqaqqarlutik maanna isumaqatigeeqqajaapput. Inuit Ataqatigiinneersoq, Kristian Jeremiassen, KNR-imut taama paasissutissiivoq. Isumaqatigiisut påskertinnagu saqqummiussinnaallugu taassuma neriuutigaa.

- Tassa uunga killippugut allagaq isumaqatigiissutigisinnaasarput, taanna, isikkua, naammassinngujuulerluni.

Kristian Jeremiassen, KNR-imut taama oqarpoq.

Inuit Ataqatigiit Naleqqap Demokraatillu oqaloqatigiinnerat, Naleqqameersup, Jens Vetterlainip, ataasinngornermi aamma uppernarsarpaa.

IAp Siumut suleqarigerusunngikkaa

Siumut Inuit Ataqatigiinnik suleqatiserinnillutik, amerlanerussutaarunnermik kingorna, tassa tallimanngormat, saaffiginnipput. Taakkuami partiit marluk amerlanerussuteqarsinnaagaluarput.

Kisianni tamanna pissanngilaq. Inuit Ataqatigiit Siumup suleqatiserinnissutaanut maanna qujaannarput.

Siumummi qineqqusaarutini pingaarnerpaaq, tassa kommunimi allaffissornikkut politikkikkullu aaqqissuussaanerup allanngortinnissaa, piviusunngorsinnaajunnaarmat tunukkaa, Inuit Ataqatigiit naliliipput.

- Tassa taamatut naaperiuteqarput. Mumingaatsiarput.

Kristian Jeremiassen taama oqarpoq.

Siumut, Atassut Nalerarlu periarfissaajunnaartut 

Tamannali Siumup, Atassut Nalerarlu peqatigalugit sapaatit akunnerisa siulianni amerlanerussuteqarneranni periarfissaasimanngikkaluarpoq.

- Siullermik kaffisoqatigivagut marloriarluta, tamanna kissaatiginngerluinnarpaat. Taava massakkut ikinnerussuteqartoqalernerata kingorna massakkut naaperiutigineqarpoq.

Kristian Jeremiassenip, oqarnera naapertorlugu Siumut ullormit ullormut sangusajaartumik, Inuit Ataqatigiit peqataaffigisinnaanngisaanik maanna politikkerpoq.

Siumup IA-mut naaperiutaasa ilaat KNR-ip allakkatigut takuai.

IA: Siumup qineqqusaarutini alarpai 

Kommunip inuussutissarsiortunut aallarnisaasunullu siunnersuisarfiata Qeqertalik Business Councilip, matunissaa Siumup, Atassutip, Naleqqallu isumaqatigiissutaanni ilaagaluarpoq. Pilersaarulli taanna taamaatinneqassasoq Siumup IA-mut naaperiutigigaluarpaa.

- 100 procentimik mumeqqinnaarlutik iliuuseqarput.

Kristian Jeremiassen taama oqarpoq. Nangipporlu:

- Takusinnaavarput pissaaneq paarineqarniaannarluni taamaallaat anguniakkanik allannguisoqartoq. Issiaviit issiavigineqarniaannarlutik.

Inuit Ataqatigiit gruppianneersoq, Kristian Jeremiassen taama oqarpoq.

Demokraatit suleqatigiinnut amerlanerussutilinnut peqataassappata partiiminni Kommune Qeqertalimmilu qinigaanerpaaq, Simigaq Heilmann, borgmesterinngussasoq Demokraatinit piumasaqaataasoq, Simigaq Heilmann, KNR-imut ippassaq oqarpoq.

Siumut: Inuttaasut kissaataat tusaaneqanngitsut

Demokraatit, Inuit Ataqatigiit Nalerarlu suleqatigiittussatut inissikkiartuaarnerat Qeqertalimmi Siumup paasigaa gruppip siulittaasua, Aqqa Samuelsen, marlunngornermi ualisoq allappoq.

Siumut illuatungiliunnissamut piareersimasoq, taanna allappoq.

Tassalu partiit allat amerlanerussuteqarlutik suleqatigiinniartut tassanngaanniit akuerineqarpoq. Suleqatigiilersulli aamma isornartorsiorpai:

- Avaqqulluta oqaloqatiginninnerit innuttaasut allannguinissamik kissaataat tunullugu, innuttaasut kommuunitsinnilu sulisut imminnut qaninnerullutik ammasumillu ingerlatsisoqalernissaannik kissaateqarlutik qinersisimanerat suusupagineqarluni allanngortitsiumanngittuinnaallutik kanngunartuliatut pissaaneqarusunnertut taaneqarsinnaasumik suleqatigiittussanngorput, taanna allappoq.