Qeqertalimmi isumaqatigiinniarnerit nutaat aallartipput

Kommune Qeqertalimmi politikkikkut inissinniarneq partiinut suleqatigiinnissamik isumaqatigiissimagaluartunut, tassa Siumumut, Atassummut Naleqqamullu ilungersunartorsiorfiuvoq. Nalerarmi suleqatigiinnut toqqissisimannginnertik peqqutigalugu tallimanngormat tunuliaqutaajunnaarmat suleqatigiit amerlanerussutaarupput. Taamaammat partiit kommunimi tassani tallimaasut sorliit amerlanerussuteqarlutik suleqatigiilissanersut suli paasinarsinngilaq.

Isumaqatigiinniarnerit nutaamik maanna aallartereerput. Kisianni isumaqatigiinniarnermut siuttoqanngilaq. Tamarmik imminnut attavigisaapput.

Demokraatit partiit tamaasa oqaloqatigigaat, partiimi tassani qinigaanerpaaq, Simigaq Heilmann, uppernarsaavoq.

- Assersuutigalugu Siumukkut uatsinnut sianernikuupput. Uanga aamma Atassut attaviginikuuara. Tamatta immitsinnut taamatut attaveqatigiippugut, Simigaq Heilmann oqarpoq.

Naleraq oqaloqateqartoq

Naleqqameersup, Jens Vetterlainip, isumaqatigiinniarnerit nutaamik aallartittut, peqataaffigalugit uppernarsarpaa. Suleqatissaraluaranili, Siumut Atassullu taassuma maanna oqaloqatiginngilai.

- Uanga Naleraq, IA Demokraatillu tassaniikkallarpugut massakkumut, taanna oqarpoq.

Jens Vetterlainip Siumumik Atassummillu suleqateqaqqissinnaanini periarfissaanersoq maanna oqaatigiumanngilaa.

Inuit Ataqatigiit Siumut akissuteqarfigissagaat

Siumut, IA-mut, amerlanerussusiisinnaasumut, tallimanngormat amerlanerussutaarunnermik kingorna saaffiginnittoq, Inuit Ataqatigiinneersoq, Kristian Jeremiassen KNR-imut oqarpoq. IA-kkut Siumukkunnut ullumikkut akissuteqarnissartik naatsorsuutigaat. Qanorli akissanerlutik Kristian Jeremiassenip oqaatigiumanngilaa.

Inuit Ataqatigiit isumaqatigiinniarnerni siullerni, maanna amerlanerussutaaruffiusumi, Siumumik suleqateqarniarnertik unitsillugu nalunaarutigereernikuuaat. Tassani Siumup ingerlatsinerup aaqqissuussaaneranik aallanngortitsinissamik pilersaarutaa IA-mut toqqissisimanngititsisoq peqqutaavoq.

Naleqqameersup Inuit Ataqatigiinnik Demokraatinillu oqaloqateqarnertik uppernarsareerpaa. Inuit Ataqatiinneersullumi, Kristian Jeremiassenip, Demokraatinik oqaloqateqarnertik aamma uppernarsarpaa.

- Demokraatillu oqaloqatigiinnerput soorunami taanna ataavartumik ingerlapparput, Kristian Jeremiassen oqarpoq.

Kissaateqaannaratik piumasaqartut

Demokraatit, Inuit Ataqatigiit Nalerarlu kommunimi amerlanerussuteqalersinnaapput.

Demokraatilli suleqataalissagunik Simigaq Heilmannip borgmesterinngornissaa piumasaqaataavoq.

- Tassami. Aamma pisussaaffiliivoq taamatut qinigaaneq, Simigaq Heilmann oqarpoq.