Siumut Kommune Qeqertalimmi amerlanerussuteqarunnaartoq
Kommune Qeqertalimmut qinikkat assigiinngitsut arlallit piffissami kingullermi borgmesterissatut innersuunneqarput.
Siullermik Aqqalu Reimer borgmesterissatut innersuunneqarpoq, taanna Kommune Qeqertalimmi kommunimut qinersinermi taaguunneqarnerpaavoq.
Taamaammat borgmesterinngortussatut innersuunneqarpoq, taassumali aalisartutut piniartutullu inuussutissarsiuteqarnini unitsikkusunnagit borgmesterinngorniarnini sapaatip akunnerani matumani marlunngornermi tunuartippaa.
Borgmesterinngorniaannarniarlunili Facebookikkut sisamanngornermi nalunaarutigaa, parteeqataatalu Frantz Lundbladip Aqqalu Reimerip atuuffissarisaanut innersuunneqaraluartup innersuunneqarnini tunuarteqqippaa.
Siumulli Aqqalu Reimerillu Kommune Qeqertalimmi amerlanerussuteqarnertik maanna annaavaa.
Naleqqamiimmi Jens Vetterleinip Siumut suleqatiginiarunnaarpaa, Jens Vetterlein Facebookikkut tallimanngornermi unnukkut allappoq.
Isumaqatiginninniaqqissasut
Siumut Naleqqap tapersiiunnaarnera pissutigalugu kommunimi isumaqatiginninniaqqittussanngorpoq. Partiip IA siusinnerusukkut isumaqatigiinniarfigaa, IA-li partiitut siulliulluni tunuarpoq, taakkumi ‘ingerlatsinissamut siunnerfiat toqqissisimanartinnagu paasillugit’ oqaatigaat.
Tamanna apriilip sisamaani tusagassiuutinut nalunaarutigaat.
Taamaammat kommunalbestyrelsip qanoq inissikkumaarnera piffissap ingerlanerani paasiumaarparput.
KNR-imiilli paasissutissat naapertorlugit Kommune Qeqertalimmi kommunalbestyrelse apriilip 17-iani maajillu arfineq-aappaani ataatsimiissaaq. Tamanna Franz Lundbladip siusinnerusukkut oqaatigaa.
