Aqqalu Reimer Kommune Qeqertalimmi borgmesterissanngoqqittoq
Siumumeersoq, Aqqalu Reimer, Kommune Qeqertalimmi borgmesterissatut innersuunneqanerminik marlunngornermi tunuartitsigaluartoq maanna borgmesterinngorniaqqilerpoq. Tamanna inuttaata Facebookkimi sisamanngornermi unnukkut nalunaarutigaa.
Tamannalumi aamma Siumup Aasianni immikkoortortaqarfiani, Kommune Qeqertalimmilu siulittaasuata, Frantz Lundbladip, uppernarsarpaa.
- Eqqarsaatigilluareerlugu aalajangerpoq tassunga atorfimmut ingeqqikkusulluni, taanna oqarpoq.
Taassuma oqarnera naapertorlugu Siumup gruppia sisamanngornermi unnukkut ataatsimiippoq.
Aqqalu Reimer akinngitsoq
Aqqalu Reimerip suut eqqarsaatigilluarsimanerai KNR-ip ilanngutassiamik suliaqarnermini paasinngilai. Aqqalu Reimerimummi ullaaq manna saaffiginnissutit arlallit inuttaanit akineqanngillat.
Aqqalu Reimer borgmesteritut tallimanngornermi innersuunneqarpoq. Kisianni KNR-imit akisinnaanngisaminik apersorneqarnermini, tassa marlunngornermi, borgmesterissatut innersuunneqarnerminik tunuartitsigaluarpoq. Aalisartuuneq piniartuunerlu qimassinnaanngikkini taamani tunngavilersuutigaa.
Frantz Lundbladilu atuuffimmut kommunimi qaffasinnerpaamut inissakkaluarpoq.
Kisianni tassa tamanna maanna allanngoqqippoq.
Siulittaasoq: Borgmesterissaq allanngoqqeriaannaavoq
Sulilumi allanngoqqissinnaasoq borgmesterissatut maanna inissisimajunnaartoq naliliivoq.
- Suli ivertinneqanngilagut. Aamma taassuma tungaanut allanngorartoqarsinnaavoq. Aamma allani taamaattoqartareerpoq. Taamaammat taanna immaqa annerusumik ippinnartutut taaneqarsinnaanngilaq, Frantz Lundblad oqarpoq.
Taassuma siusinnerusukkut ilisimatitsinera naapertorlugu Kommune Qeqertalimmi kommunalbestyrelse maajip arfernata arfineq-aappaatalu missaani inissilluni ataatsimiissaaq.
Tatiginninnermut innarliissanngitsutut nalileraa
Borgmesterissatut piukkussat allanngorarnerat kommunimi qinersisartut tatiginninnerannut innarliissanngitsoq Frantz Lundblad isumaqarpoq.
- Uanga taama isumaqanngilanga. Aarlerinanngilaq,. Frantz Lundblad oqarpoq.
Amerlanerussuteqarnersoq suli qularnartoq
Aqqalu Reimer amerlanerussuteqartunit tunuliaquteqassaguni partiit allat qinigaatitaat marluk atorfissaqartippai. Taakkuli tunuliaqutaanersut KNR-ip uppernarsarsinnaanngilaa.
KNR-ip Naleqqamit qinigaq, Jens Vetterlain, aalajangeqqinnermut tunuliaqutaanersoq pillugu saaffigigaluarpaa iluatsinngitsumik.
KNR-ip Atassummit qinigaq, aamma borgmesterip aappaattut siullertut innersuussaq, Maritha Broberg, apersorusullugu attaveqarfigaa. Taannali aammaarluni apersoqqunngilaq.
