Borgmesterissaq nutaaq: Sapiutinngilanga
Kommune Qeqertalimmi borgmesterissamik nutaamik innersuussisoqarpoq. Taamaalilluni kommunimi tassani Siumumeersuni qinigaanerpaap tullia, 124-nit taaguunneqartoq, Frantz Lundblad, kommunimi qullersatut atuutilertussatut inissippoq.
Innersuunneqaqqaaraluartoq, Aqqalu Reimer, maanna innersuunneqartumit arfineq-marlunnit taaguunneqarnerusoq, piniartuuneq aalisartuunerlu qimakkusunnagit borgmesteriorusukkunnaarluni marlunngornermi unnukkut nalunaarpoq.
Taama pisoqarnera maanna innersuunneqartup ima qisuariarfigaa:
- Ullormit ullormut assiliap allanngoriasaarnera soorunalimi uannut tupannaqqaalaarpoq. Kisianni aamma atorfik taanna misilittagaqarfigigakku aamma soqutigalugulu sapiunnanga tassani misigisimavunga, Frantz Lundblad oqarpoq.
IA-mit Siumut
Taanna qinigaaffimmi maanna naalersumi Inuit Ataqatigiit tunuliaqutaralugit qinigaavoq. Borgmesterillu tulliatut siullertut aamma atuuffeqarluni. Borgmesterip sulinngiffeqarnerani allamilluunniit peqquteqartumik atuutinnginnerani borgmesteritut atuunneq misilittagaqarfigaa. Taamaattumik suliassaminut nalorninani oqarpoq.
Frantz Lundblad IA-mit anilluni Siumumut 2022 naalersoq ilaasortanngorpoq. Taassuma kommunip aaqqissuussaanera, Siumup maannakkut siuttuulluni allanngortilersaagaa, iluarinnginnamiuk partiini taamani tunuppaa.
Borgmesteritulli maanna issiavissaminut ingikkuni suliassani siulleq nalunngilaa.
- Kommunitta aningaasaqarnerata killiffia sumut killinnersoq. Aamma ukiut tamaaviisa missingersuutinik annertoorujussuarmik sippuisuaannarnikuuvugut ilaatigut aningaasanik annikippallaanik immikkoortitsisarsimanerput peqqutigalugu, Frantz Lundblad oqarpoq.
KNR-ip Kangaatsiami Aasiannilu inunnik isumaginninnermik suliaqarfik 2022-mut missingersuutinik 21 millionit koruuninik sippuiffiusoq, 2022-imi ukioq naalersoq oqaluttuaraa.
Missingersuutit allanngorusukkai
Siuttussat nutaat allanngortitererusupput. Missingersuutit akuerisaareersut allanngorsinnaassanersut aamma paasinialersaarpaat.
- 2025-mut kommunalbestyrelsip uuma siuliata atuuttup qanoq annertugisumik allanngortitseriffigisinnaanerlutigu aamma misissorumaarparput, Frantz Lundblad oqarpoq.
Kommune Qeqertalimmi ingerlatsinermut ukioq mannamut angusat 71 millionit koruuninik sinneqartoorfiunissaat maannamut missingersuutaavoq.
Amerlanerusunik tunuliaqutaqarnersoq suli uppernarsarneqanngitsoq
KNR-ip Frantz Lundbladip borgmesterinngortussanngornera amerlanerussutilinnit tunuliaqutaqarnersoq maanna suli uppernarsarsinnaanngilaa. Amerlanerussusiinissamut amigaataasoq, Atassummit qinigaq, Maritha Broberg, KNR-imut akissuteqassalluni neriorsuisoq, apersorneqarnissaminut piffissaqarani allappoq.
KNR-ip Maritha Brobergip, Frantz Lundbladip siuttunngornissaanut tunuliaqutaanera suli paasinngilaa.
Naleqqameersorli, Jens Vetterlain innersuussamut tunuliaqutaalliuni KNR-mut pingasunngornermi oqarpoq.
