Kommune Qeqertalimmi qinikkat IA-mit Siumumut ilaasortanngortut

Kommune Qeqetaliup kommunalbestyrelsiani Inuit Ataqatigiit, inunnik marlunnik ikilipput.

Taakkua tassaapput, borgmesterip tullia siulleq, Frantz Lundblad, Karl Thue Nathanielsenilu.

Taakkua partiimut kommuniminni ikinnerussuteqarluni illuatungiliuuttumut, Siumumut ilaasortanngorput.

Taama pinerannut Kommune Qeqertaliup kommuninngoqqaarami allaffissornikkut aaqqissuussaaneq atuligaa peqqutaavoq.

- Ajoraluartumik kommunitta nutaatut aaqqissuussaanerata uagut qinikkatut oqartussaassuserput atorunnaarsilluinnangajassimagamiuk, Frantz Lundblad KNR-mut oqarpoq.

Sippuineq ilisimaneqanngitsoq 

Taassuma assersuutigaa Kangaatsiami Aasiannilu inunnik isumaginninnermik suliaqarfiup missingersuutaasunit 21 millionit koruuninik sippuisimanera, aningaasaqarnermut ataatsimiititaliami ilaasortatut ilisimasimanngikkitsik.

- Kommunitta nutaatut aaqqissuunneqarnerata ajortortaasa tamakkua ilagivaat. Paasissutissat pingaarutilerujussuit uagut ataatsimiititaliani ilaasortaasugut ilisimasassagut ilisimaneq ajoratsigit tamanna uggornartorujussuuvoq, Frantz Lundblad oqarpoq.

Inuit Ataqatigiinnut ilaasortaajunnaartut kommunip aningaasaqarnermut ataatsimiititaliaanut, INUA-mi, aamma ilaasortaapput.

Suleqatissani qilanaarigai

Kommune Qeqertalimmi Inuit Ataqatigiit marlunnik ikilinerat taakkua amerlanerussuteqarnerannut allannguuteqassanngilaq. Partiimmi Atassutip ilaasortaatitatuaa, Naja Kristensen suleqatigalugu, kommunimi issiavinni 15-suni, maanna suli arfineq-pingasunik ilaasortaqarput.

Illua-tungiliuutunngorneq nuuttumit iluarisimaarneqarpoq.

- Qilanaarpunga. Aamma ataatsimiititaliani Siumukkut uanga suleqatigilluartareerakkit, Frantz Lundblad oqarpoq.

Taassuma Karl Thue Nathanielsenillu Inuit Ataqatigiinnit tunuarnerisa saniatigut, Akunnaami nunaqarfimmut aqutsisunit, Gerth Nielsen, Ikamiunit Ole Johansen, Niaqornaarsummiillu Hans Jerimiassen, aamma partiimit tunuarlutik Siumumut ilaasortanngorput.