Aqqalu Reimer borgmesterissatut imminut tunuartittoq
Kommune Qeqertalimmi borgmesterissatut innersuunneqaqqaaraluartoq, Siumumeersoq, Aqqalu Reimer, innersuunneqarnerminik nammineq tunuartitsivoq.
Tamanna taassuma nammineerluni Facebookkimini ippassaq unnukkut qulinngulersoq nalunaarutigaa.
- Eqqarsaatigilluareerlugu borgmesterinngornissara Siumumi qiningaanerpaap tullianut Frantz Lundblad-mut tunniuppara.
- Ilisimaneqartutut piniarneq aalisarnerlu inuussutissarsiutigaakka, taakkualu imaaliallaannaq qimassinnaanagit paasivara, pinngortitarsuaq piniagassallu inuuninnut ilaalluinnartuummata, Aqqalu Reimer allappoq, borgmesterissatut innersuunneqarnerminik nammineerluni tunuartoq allappoq.
Parteeqanni innersukkaa
Aqqalu Reimer Siumumeersunit qinigaanerpaalluni 131-init taaguunneqarpoq. Borgmesterissatut maanna taassuma innersuussaa, Frantz Lundblad, taanna arfineq-marlunnik ikinnerusunit piukkunneqarluni taaneqarpoq.
Akissutissaqarneq ajortoq
KNR-ip Aqqalu Reimer, suleqatissatik Naleraq Atassullu peqatigalugit, kommunimi allaffissornikkut politikkikkullu ingerlatsinermik allannguinissamik siunnerfeqarnerat, taassumalu aningaasatigut kingunissai, pillugit ataasinngornermi apersoraluarpaa.
Borgmesterissatulli innersuunneqaqqaaraluartoq akissutissaqarneq ajorpoq, gruppimilu siulittaasuminnut, Aqqa Samuelsenimut innersuussilluni.
Borgmesteri kommunalbestyrelsinngortup ataatsimeeqqaarnerani pisortatigoortumik aatsaat ivertinneqassaaq.
Siumut-gruppia tapersiisoq
Kommune Qeqertalimmi Siumut-gruppiata Aqqalu Reimerip aalajangernera ataqqilluinnarlugu naallu nutaamik borgmestereqalertussanngoraluartoq allamik allanngortoqassanngitsoq pingasunngornermi ullaakkut tusagassiuutinut nalunaarutigaa.
- Qinersinerup inernera aallaavigalugu sulinerput nangissavarput. Atassut aamma Naleraq suleqatigalugit politikikkut isumaqatigiissutissatta imarisai allannguuteqanngillat.
- Erseqqissarusupparput Siumup gruppiata iluani kina borgmesterinngussanersoq pillugu assigisaatigulluunniit salliuniartoqarnikuunngimmat. Qinersinerup inernera tunngavigeqqissaarlugu sulisimavugut. Sulinerput tamatigut isumaqatigiinnikkut ingerlanneqarsimasoq naqissuserusupparput.
