Borgmesteritut innersuunneqartup apeqqutit akisinnaanngikkai

Kommune Qeqertalimmi politikkikkut aqutsisut ingerlatsinermilu aqutsineq allanngussapput. Tassami Siumut kommunimi tassani partiini qinerneqarnersaalluni anginersanngorpoq. Taakkua siuttuullutik Atassummiumik Naleqqameersumillu suleqateqalerneranni allanngortitsinissamik aalajangiipput.

Suleqatigiilersulli sooq tamanna allanngortitassatut aalajangerneraat borgmesterissatut innersuunneqartup, Siumumeersup, Aqqalu Reimerip akissutissaqartinngilaa.

- Taanna akiuminaatsilaajussappara, taanna oqarpoq.

Innersuussisoq

Kommune Qeqertalimmi ingerlatsinermi maanna atorneqartoq kommunit allat atugaannit allaaneruvoq. Assersuutigalugu ataatsimiititaliaq ima taaguuteqarput: Inua, Inoqarfik, Inuit aamma Timi Tarni. Illoqarfinni pisortat allaffissornermi aqutsisutut aamma atorneqarput. Taakkua Kommune Qeqertalinngormat tulluussarneqarlutik Inuit Ataqatigiit siuttoralugit atuutsinneqalerput.

Taanna atorunnaarlugu kommunit allat assigalugit ingerlatsivinnik maanna pilersitsisoqartussanngortoq partiit isumaqatigiissuteqartut nalunaarput.

Taamaalippat pisortatut atorfiit amerlissapput. Tamanna isumaqatigiissuteqartut isumaqatigiissutaanni allaqqavoq. Tamannalumi aamma kommunimut aningaasartornerunermik kinguneqassasoq qularnanngilaq.

KNR suleqatigiilersut sooq inuttaasut aningaasaataat allaffissornermut atorneqartut amerlinissaat kissaatigineraat siuttussatut piukkunneqartumut aperivoq. Apeqqulli aamma akiuminaatsippaa.

- Taannartaa immaqa Aqqamut innersuussinnaavara, taannartaa. Akiuminaatsilaajusakkakku uanga taanna. Taassuma nalunnginneruai, taassuma iluani, Aqqalu Reimer oqarpoq.

Tassalu taassuma Siumup gruppiani siulittaasutut toqqagartik, Aqqa Samuelsen, innersuuppaa.

Innersuusseqqittoq

KNR-illi borgmesterissamut aaqqissuussinermut atorneqalertussatut aalajangikkamut tunngasumik apeqqutissai ikinnerulinngillat.

Qanoq akeqaratarsinnaaneranik erseqqissumik suli naatsorsuuteqanngilasi?

- Tassunga tunngatillugu Aqqa akinerusinnaasoq, tassunga innersuussinnaavara.

Borgmesterissaq: Qinikkatut nutaajuvunga

Aningaasanut tunngasut akiuminaatsippatit, borgmesterinngortussanngorlutillu. Sooruna taakkua akiuminaatsikkitit?

- Aatsaat tassa politikkimut nutaarluinnartut iserpunga. Tassa taanna peqqutaanerpaajuvoq. Iluamik pulanikuunngisaannarlunga, aalisartuullungalu piniartuugama taava tassunga periataarnera assut pulaniarsuaarpunga massakkut, borgmesterissatut innersuussaq, Aqqalu Reimer oqarpoq.

Taanna 131-nit taaguunneqarpoq.