Kommunini pingasuni kommunalbestyrelsinngortut sapaatit akunnerata uuma naanerani qanoq inissittornissartik isumaqatigiissutigaat.

Kina Kommune Kujallermi borgmesterinngussanersoq kisimi pissangassutaalerpoq. 

Siumut kommunalbestyrelsinut qinersinermi taaguuneqarnerpaasoq Kommunini ikinnerpaamik pingasuni borgmestereqalissasoq qularnarunaarpoq, tassaasuni Avannaata Kommunia, Kommune Qeqertalik aaamma Qeqqata Kommunia.

IA kommunini pingasuni maaannamut borgmestereqarsimasoq, maanna ataasiinnarmik borgmestereqalerpoq, tassa Kommuneqarfik Sermersuumi.

Taavalu Kommune Kujalleq kisiartaalluni suli isumaqatigiissusiorfiunngitsoq, kommunini qinikkaniit inuit attaveqatigiittarfiinut sapaatit akunnerata naanerani nalunaarutit KNR-imiillu attaveqarnerit ersersippaat.

Qeqertalik: Siumut, Atassut Nalerarlu 

Kommuni Qeqertalimmi kommunalbestyresimut ilaasortanngortut suleqatigiinnissamik isumaqatigiinniarnerat tallimanngormat unnukkut aqqaninngorluinnalersoq naammasssivoq.

Siumut, Atassut Nalerarlu amerlanerussuteqaqqalaarlutik tassani suleqatigiissapput.

Tassami Siumut, arfinilinnik, Atassut ataatsimik Nalerarlu aamma ataatsimik ilaasortaqarput.

Illua tungiliuttussat Inuit Ataqatigiit Demokraatillu arfineq marlunnik ilaasortaqarput.

Siumumeersuni qinigaasuni taaguuneqarnerpaaq, Aqqalu Reimer, borgmesteriussaaq, suleqataasunilu Atassummeersoq, Maritha Broberg, borgmesterimut tulliussaaq siulleq.

Qeqqata Siumut IA-lu

Qeqqata kommuniani qinersinermi kommunalbestyrelsemut ilaasortaqarnerpaaleqqittoq Siumut Inuit Ataqatigiillu suleqatigiilissapput.

Kommunalbestyrelsimi ilaasortat partiinit taakkunannganeersut arfineq pingasuupput.

Tassalu ataatsimik aamma taakkua amerlanerussuteqaqqarput, illua tungiliuttuusussammi, Atassut Demokraatit Nalerarlu arfineq marlunnik ilaasortaqarput.

Siumumeersoq maannamullu borgmesteriusoq, Malik Berthelsen borgmesteriussaaq, IA-mersorlu Nivi Heílmann Efraimsen tassunga siullertut tulliussaaq.

Sermersooq: IA Demokraatillu

Kommuneqarfik Sermersuumi qinikkat aamma inissipput.

Partii Kommunalbestyrelsimut taaguuneqarnerpaaq, Inuit Ataqatigiit, Demokraatillu suleqatigiissapput. Taakkua katillugit aqqanilinnik ilaasortaqarput. Taassalu amerlanerussuteqarluarput.

Inuit Ataqatigiinneersoq Avaaraq Olsen borgmesteritut ingerlaqqissaaq Demokraatineersorlu Poul Petersen tassunga tullersortaassaaq.

Siumut, IA-tulli ilaasortaqartigilersoq, Nalerarlu, ataatsimik ilasortaqartoq, iIllua tungiliuttuulerput.

Kujalleq: Suli isumaqatigiinniartut

Tassalu killiffik qiviarutsigu, Siumumeersoq Lars Erik Gabrielsen Avannaata Kommuniani borgmesterinngussasoq, KNR-ip tallimanngormat oqaluttuaraa.

Demokraatit Kommuni Kujallermi qinersinermi annerpaalerput.

Suli isumaqatigiinniarlutik, Demokraatineersoq Malene Vahl Rasmussen suleqatigiinnisssamik isumaqatigiinniarnerni siuttuusoq, KNR-imut sapaammi ualisoq oqarpoq.