Simigaq Heilmann Qeqertalimmi borgmesterinngussaaq

Kommunimut qinersisoqareernerani ullut 18-it qaangiuttullu borgmesterinngortussaq kingulleq inissippoq. Simigaq Heilmann Kommune Qeqertalimmi borgmesterinngussaaq.

Taama nammineerluni tallimanngornerup unnuani tusagassiutinut nalunaarpoq.

Demokraatit, Inuit Ataqatigiit aamma Naleraq, Siumut avaqqullugu  suleqatigiinnissamut isumaqatigiissummik atsioreersullu borgmesterinngortussanngorpoq.

- Suleqatissakkalu oqaloqatigiilluta aallartikkattali innuttaasut kommunerpullu pillugu oqaloqatigiilluarsimavugut.

- Taannaavorlu ukiuni tulliuttuni sisamani nukigisassarput, taama tusagassiutinut nalunaarummini allappoq.

Kommuunimi suliffissanik pilersitsinissamut siuariartortitsinissamullu sukataarluni sulerusunnerarpoq. Inuusuttut, inuussutissarsiortut inoqarfiillu mikinerit immikkut isiginiarniarpai.

- Ikiortariaqavissut ikiussagutsigit inuussutissarsiornikkut takornariaqarnikkullu siuarsaanissarput pisariaqarpoq, tamassuma angunissaanut innuttaasut suleqatiginissaat qilanaaraara, taama tusagassiutinut nalunaarummini allappoq.

Sulinngiffeqarallassasoq

Borgmesterinngoruni, Inatsisartunut qinikkatut ilaasortaanerminiit, sulinngiffeqarallarnissaminut qinnuteqartariaqassaaq.

- Inatsisartuni sulinissaraluara qilanaarisimagaluarpara. Kommunerisamili borgmesteritut akisussaaffeqarnissaq pisussaaffik naaggaarneqarsinnaanngilaq, taanna oqarpoq.

Siumumik tapersersuinerminik taamatullu amerlanerussuteqaraluarnermik tunuartitsisuusoq, Jens Vetterlain Naleqqameersoq Viceborgmesterinngussaaq.