Qeqertalimmi politikkikkut uiverneq uningajalersoq

Kommunenut qinersisoqarnerata kingorna Kommune Qeqertalimmi politikkikkut pissanganartorsiortoqaqaaq – maannali isumaqatigiissusiortoqarnissaa qallivoq.

Siullermik Siumut Nalerarlu Aqqalu Reimer borgmesteriutillugu isumaqatigiissiusiamik atsioqatigiipput.

Tassanngaannartumik Aqqalu Reimer atorfimmiit tunuarpoq. Taanna taarserlugu Siumumi parteeqataa Franz Lundblad borgmesterinngortussanngorpoq. Iluatsinngimmat parteeqatigiit Aqqalu Reimer toqqaqqippaat.

Taamaakkaluartoq partiip tusagassiutinut nalunaarutaanni, partiip iluani avissaartuuttoqarnanilu isumaqatigiinngittoqannginnerarpaat.

Pisut ingasappallaalernerat peqqutigalugit Jens Vetterlein Naleqqameersoq isumaqatigiissusiamiit tunuarpoq. Taamanili Inuit Ataqatigiit, Naleraq Demokraatillu kommunip siunissaa pillugu ataatsimiittalerput.

Demokraatit borgmesterilu

Isumaqatigiissusiaq piareeriaannaasoq, Kristian Jeremiassen IA-meersoq oqarpoq.

- Påskennginnerani piareernissaa naatsorsuutigaarput. Oqallisigisavut naammassiliivippagut, isumaqatigiissusiornerpullu allaqqissaaleruttorparput.

Demokraatimeersumillu borgmestereqalernissaa isumaqatigiissutigineqarsimasoq ersersippaa.

Pilersaarusiaq attanneqassappat Simigaq Heilmann 34-nik ukiulik Demokraatineersoq borgmesterinngussaaq. Kommunini qinersinermi 204-nik qinerneqarpoq, kommunemilu tassani qinerneqarnerpaalluni.

Simigaq Hielmann tassunga atuuffeqalernini tulluusimaarutiginerarpaa.

- Tatigineqarnera qujamasuutigaara, qineqqusaarnermimi tamanna anguniagaraara, taamaammat tapersersorneqarnera nuannaarutigaara.

Inatsisartuniit tunuartoq

Borgmesterinngortussaq Inatsisartunut aamma qinigassanngortinnikuuvoq, 70-nik qinerneqarluni, qinernikikkaluarluni iserpoq.

Kommune Qeqertalimmili isumaqatigiissusiassaq iluatsissappat atorfimminiit tunuarnissani piareersimaffigaa.

- Borgmesterinngussaguma Inatsisartuniit tunuassaanga, Simigaq Heilmann oqarpoq.

Taamaattoqassappallu Napãtôk Petrussen Kommune Kujallermeersup Inatsisartuni atorfik tigussagaa ilimanarpoq. Taanna qinersinermi 18-inik qinerneqarpoq, sinniisussallu pingajuattut inissilluni, sinniisussallu siulii marluk isereernikuummata  Napãtôk Petrussen inatsisartunut isissaaq.

Allatseqarfiup kommuneqarfimmi kommunalbestyrelsit nutaat maajip aappaanni ataatsimiinnissamut aggersarnialeruttorpaat, Kristian Jeremiassen oqarpoq.

Siumut illuatungiliuttutut nukittuutut inississasoq, partiip kommunalbestyrelsimi gruppiata siulittaasua Aqqa Samuelsen KNR-mut oqarpoq.