Pele Broberg: Kollegialiortitsiniarunnaarneq aqutsisut takorluugaqannginnerannik ersersitsivoq
Naalakkersuisut sisamanngormat avammut nalunaarutigaat, Nuummi kollegialiortitsinissaq taamaatinneqartoq. Suliniullu ukiuni marlunni kinguartinneqassasoq.
Tamannali Naleqqap siulittaasuata Pele Brobergip uggorilluinnarpaa, inuusuttorpassuit nunarpullu tamarmi pakatsisinneqarput, taanna taama oqarpoq:
- Inuusuttut siunissaraagut aamma ilinniartitaaneq siunissaralugu oqariartortarnikuullutik maanna Nuummi kollegialiortitsinissamut unitsitsiniarnerat akuerisinnaanngilluinnarparput, Pele Broberg oqarpoq.
Naalakkersuisut namminneerlutik tusagassiutinut allakkiaminni nassuiaapput: Entreprenørimik neqerooruteqartumik isumaqatiginninniarnermi akimik naammaginartumik isumaqatigiissuteqarsinnaasimannginneq patsisaalluni neqeroortitsineq taamaatittariaqarsimasoq.
Taamatulli taakku nassuiaateqarnerat Pele Brobergip aamma isumaqatiginngilaa:
- Qanorluunniit qiviaraanni tamanna pingaarnersiuinermik tunngaveqarpoq, taamaammat piumagaanni iliuuseqarumagaannilu kollegialiortoqarsinnaagaluarpoq, Pele Broberg oqarpoq.
Politikerit piviusorsiunngitsut pilersaaruteqanngitsullu
- Inuusuttut salliutinneqanngiinnanngillat aammali taamaatiinnarnertut nalilertariaqarpoq. Aningaasaqarnerup pilersaarusiorneqannginnera, siuttullu takorluugaqannginnerat tamakkuninnga nassataqartarpoq, taanna oqarpoq.
Pele Broberg aperaarput mittarfiliortitsisoqarnera nunarsuarmilu aningaasaqarnerup tamaviaartitsinera aningaasat tungaasigut kipusoorutaasinnaammat paasisinnaannginneraa.
Taannali isumaqarpoq pilersaarusiornerluppallaarneq tamatumunnga ajornartorsiutaasoq.
Taannami naapertorlugu, inuusuttunut tunngassuteqartut politikkikkut pilersaarusiorneqanngippallaaqaat.
Tapiitsutut sattapput
Tamannalu ajornartorsiutinik pilersitsiinnartussaasoq taanna isumaqarpoq:
- Tappiitsutut sattapput, taamaaginnartoqarsinnaanngilarlu, naalakkersuisooqatigiit ilinniartitaanermut, namminiilivinnissamut peqqinnissaqarfiullu tungaatigut pilersaaruteqanngillat, suut tamarmik teqeqqumut eqiterunneqarput ataatsimiititaliarsuarnik nalunaarusianillu qinuniannguarlutik, oqarpoq nangipporlu:
- Pisut tamakku utikattuarput, eqiasunnerujussuaq takorluugaqannginneq aningaasaqarnermullu paasisimasaqannginneq matumani peqqutaapput, taanna oqarpoq.
KNR-ip Ineqarnermut Attaveqaasersuutinullu Naalakkersuisoqarfimmiit akineqarnissani utaqqivaa. Ilinniartut inissaat qassit kinguartinneqarnersut paasiniarparput.
