Pele Broberg Múte B. Egedip ukiortaami oqalugiaataa pillugu: Suliniutit erseqqissut amigaataapput

Naalakkersuisut siulittaasuat, Múte B. Egede (IA) jaanuarip aallaqqaataani oqalugiarpoq. Taassuma oqalugiaammini ilaatigut peqqinnissaqarfimmi unammillernartut, nunasiaataasimanerup nalaani pisut akuersaarneqarsinnaanngitsut silallu pissusiata allanngoriartornerata kingunerisaanik kingunerit ilaatigut eqqartorpai.

Atassutip siulittaasuata, Aqqalu Jeremiassenip ukiortaami oqalugiaat ajunngitsumik isummerfigaa.

- 1-imiit 10-mut naliliiffigissagukku 7-mik nalilerusuppara. Isumaqarama suleqatigiiffigisinnaasunik assigiinngitsunik siunertalimmi oqalugiartoq, ilaatigut soorlu inuiaqatigiinnut tunngassuteqartunik akisussaaffiliinissaq taamatuttaarlu sanngiiffiusinnaasut suleqatigiiffiusinnaasullu tamaasa oqariartorfigalugit.

Demokraatilli siulittaasuata, Jens Frederik Nielsenip siulittaasup oqalugiataanut naammagisimaannginneruvoq.

Assi © : KNR / Malik Brøns

Demokraatit siulittaasua, Jens-Frederik Nielsen.

- 5-imut immaqa inississagaluarpara. Naalakkersuisut siulittaasuata oqalugiaataa imartuvoq aamma siammasittorujussuarmik eqqartuivoq. Meeqqaniit utoqqarnut. 

- Ajunngitsumik eqqaasaqarpoq, pisimasullu eqqartorlugarpai. Qanorli iliorluta pitsaanerulertissinnaavarput, takorluukkat sumiippat? Inuiaqatigiit pitsaanerusumut aallartinnissaannut aqqutit suut toqqarneqarsinnaappat, taakku amigaatigaakka, Jens Frederik Nielsen oqarpoq.

Naleqqap siulittaasuata Pele Brobergip Múte B. Egedip oqalugiaataa aamma isornartorsiorpaa.

- Imarisaanut soorunami nalileerpiarsinnaanngilanga, kisianni nalunngilarput inuttaa oqalloreqaaq. Oqaatsit nuannersut tusartakkavut tusarlugit  nersualaagassaavoq, pikkoriffeqarpoq, kisianni politikikkut imaqannginnerani immaqa 2-miitissinnaavara, Pele Broberg oqarpoq.

Suliniutinik ersarissunik amigaateqartoq

Múte B. Egedip ukiortaami oqalugiarnermini inuaqatigiinni ataatsimoornissaq, utoqqallu inuiaqatigiinnut qanoq pingaaruteqartiginersut erseqqissaatigaa.

Naalakkersuisut siulittaasuata nunatsinni imminut toquttarnerup ajornartorsiutaanera, peqqinnissaqarfimmillu atukkat ilungersunarnerat, silaannaallu pissusiata allanngoriartornerisa kingunerisaanik innuttaasunut nunatsinnullu kingunerluuteqarnera eqqartoraluaraa, pitsaanerusumik imalimmik oqalugiarsinnaasoq, partiit pingasut isumaqarput.

Assi © : Ane-Marie/KNR

Atassutip siulittaasua, Aqqalu Jerimiassen

- Oqariartuutit assigiinngitsut immaqa qulequtaaqqatut inissisimaneri, naalakkersuisoqatigiit oqariartuutigisaminut sammitinnerusinnaagaluarpaat, suunuku taaneqartut uani siunertariniarigut? Taamaattunik imaqarnerusinnaagalluarpoq, Aqqalu Jerimiassen oqarpoq.

Tamanna Pele brobergip aamma isumaqatigilluinnarpaa. Nunatsinni allannguutissat sorpiaat siunniunniarneqarnersut erseqqissumik Múte B. Egedip oqaatiginngikkaa taanna isumaqarpoq.

- Neriorsuutepassuit oqaatsit timitaqanngitsut takoqqippagut. Oqalugiaat qiviaraanni nuannersinnaasunik imaqaraluarpoq. Oqarpormi allanut tikkuartuinatagooq. Kisiannilu nammineq tikkuartuilluni piviusorsiortuninngooq tunuliaquteqarluta oqallittassaagunngooq tikkuartornagulu suna sumilu qanoq taamatut pisoqarsimannginnera, Pele Broberg oqarpoq.

Partiit siulittaasuisa kissaataat

Partiit siulittaasui pingasut Múte B. Egedip issiaviani issiasuugaluarunik oqalugiaataat qanoq imaqassanersoq KNR-imiit aperaagut.

- Oqalugiaammi eqqaaneqarpoq aningaasat naleerukkiartornerat, aningaasallu naleerukkiartornerat innuttaasunut assut sunniuteqarpoq. Inuuniarneq akikinnerulertissavarput, nioqqutissat akikinnerusariaqarput, innuttaasut tunngaviusumik akissarsiakippallaarput. Taakku qaffassagaluarpagut, Jens-Frederik Nielsen oqarpoq. 

Aqqalu Jerimiassen ukiortaami oqalugiassasuugalugaruni nunatsinni namminersorlutik inuussutissarsiortut ukkatarinerussagaluarlugit oqarpoq.

Assi © : KNR

Naleqqap siulittaasua, Pele Broberg

- Namminersortunut inuussutissarsiuteqartunut toqqammavilimmik oqariartuutaata amigarsorinarsinnaanera, illuanullu qitiusumut annertuumik oqariartornera, taanna oqarpoq.

Pele Brobergilli ukiortaami oqalugiassasuugaluaruni aalisartut piniartullu qanoq ikiorserneqarsinnaanerat ukkatarinerorusussagaluarpaa.

- Piniartut aalisartullu nunatta nappatai timitalimmik ikiorsernissaanik oqariartuuteqarsimassagaluarpunga.  Naalakkersuisut siulittaasuata massakkut oqariartuutigaa, ilinniartitaanerooq naalagaaffinngornissamut siunissaraarput, naak tassani aalisartut piniartullu?, Pele Broberg aperaaq nangillunilu:

- Tupinnartorujussuugami uani oqaasertalernerani timitalersuerusunnginnerat, Pele Broberg oqarpoq.