Ilinniartut: Pisiassat akitsorujussuarnerat annikilliornaqaaq

Ilinniartut ilaasa pisiniarfinni pisiassat akitsormata qaammammusiatik naammakkunnaartillugit marlunnik suliffeqartariaqarlutik KNR-mut oqaluttuarput.
Assermi saamerlermiippoq, Ilinniarfissuarmi ilinniartoq, Niels Henrik Andersen. Talerperlermiippoq ilinniartoqataa, Gigi Kruse Poulsen. Assi © : Assiliisoq Megan
Allattoq Megan Hansen
aggustip 30-at 2022 16:30

Pilersuissumi Brugsenimilu nioqqutissat akitsornerat ulluni kingullerni KNR-imit allaasereraagut.

Pisiniarfinni pisiassat akitsornerannik avannaaniittuinnaat sunnigaanngillat. Tamanna pillugu Nuummi Ilisimatusarfimmi ilinniartut pisiniarfinni pisiassat ilaat akitsorsimanerat qanoq malugisimaneraat apersorpagut.

Naapitatta ilagaat Juliane Løvstrøm. Taanna Ilulissani najugarisaq qimannangu ilinniartitsisunngorniarpoq.

Pisiassat akitsornerat malugiviuk?

- Soorunalimi malunnarpoq Ilulissani najugaqaratta taavalu ilinniartuulluni qaammammut 4.700 meeraqaraanni 5.700 qaammammut tigusarpakka, kisianni uiga sulisarami taassuma aningaasat isertitai atortarpagut naammattusaarilluta. Juliane Løvstrøm taama KNR-mut oqarpoq.

Pisiassat akitsornikuuneri ilinniartuulluni qanoq sunniuteqarpa?

- Sunniuteqartorujussuuvoq, soorlu nerisartakkagut allanngoriartorsinnaasut tassani peqqinnannginnerusunut immaqa nuukkiartorneq, immaqaluunniit naammattusaarineq tilbudinilluunniit ujartuineq.

Qaammammut pisartakkatit inuuniarnermut naammattarpat?

- Naamik decentralerma inigisatsinnulluunniit akiliutissakka amigarput, meeqqerivimmullu akiliisariaqarluta. Saniatigut aamma nerisassat.

Pisiassat akitsornikuuneri qanoq sunniuteqarpa?

- Soorlu sulinerunermik sunniuteqartorujussuuvoq, piffissaq annertooq atortalerparput sulinermut. Juliane løvstrø oqarpoq.

AAMMA ATUARUK Larsine Frederiksen: Nioqqutissat akitsungaarmata pisiarisartakakka allanngortippakka

Nuummi ilinniarfissuarmi ilinniartitsisunngorniartoq, Niels Henrik Andersenip Nuummi nioqqutissat akitsorneri aamma malugeqai.

Pisiassat akitsornikuuneri ilinniartuulluni qanoq sunniuteqarpa?

- Maanna mianernarsivoq arlaatigut aningaasanik atuiniarnitsinni pisiniaraangatta. Assersuuutigalugu uanga aapparalu qinngutsinni najugaqaratta ullaakkut bussertariaqartaratta aapparalu erneralu, tassungaannaq ca. 1.600 1.700 tungaanut atortarparput, Niels Henrik Andersen oqarpoq.

Qaammammut pisartakkatit inuuniarnermut naammattarpat?

- Naamerluinnaq naammanngilluinnarput ilinniarnerma saniatigut marlunnik suliffeqartariaqarpunga, unge centerimi portørinilu.

Pilersuisup nioqqutissaataani akitsornerpaat tallimat
                                                                                    Manniit arfinillit Davameersut: Januaarimi 19,95 kr. - maanna: 21.95 kr.

Makkariina siatsisissaq Rema 1000-meersoq, 500 g: Januaarimi 10,95 kr. – maanna 15,95 kr.

Qallersuut Salami Gølimeersoq 250 g: Januaarimi 24,95 kr. – maanna 34,95 kr.

Makkariina siatsisissaq Omameersoq, 500 g: Januaarimi 21,95 kr. - maanna 29,95 kr.

Qallersuutissat Rullepølset Pålækkerimeersut, 90 g: Januaarimi 21.95 kr. – maanna 28.95 kr.

Tusarfik: Pilersuisoq

Pisiassat akitsornikuuneri qanoq sunniuteqarpa?

- Aapparalu naammattusaariniartarpugut soorlu taquassat tamatsinnut naammattut. Akikillisanik ujaasinerusarpugut. Soorunami ilungersunarsinnaasorujussuuvoq kammalaateqarama angallatilimmik aalisakkanik pisanillu allanik iluaqutaasaqaat, taamaassimanngitsuuppat suli ilungersunarnerusimassagaluarpoq.

Pisiassat akitsornikuuneri ilinniartuulluni qanoq sunniuteqarpa?

- Sulisariaqartarpunga, ilaannikkut sianerfigitikkaangama immaqa piffissaqanngikkaluarlunga angiinnartariaqartarpunga, soorlu ilinniagassat suliarisariaqartarpagut aamma, ilaanni alaannartariaqartarpakka.

pisiassat akitsorneri qanoq isumaqarfigaajuk?

- Ilinniartuulluni nuanninngilaq ulluinnarni inuuniarneq aningaasatigut oqimaappoq, taama Niels Henrik Andersen oqarpoq.

AAMMA ATUARUK Ataatsimut isigalugu: Nioqqutissat qulit uku akitsornerpaapput

Gigi Kruse Poulsen marlunnik meeraqarpoq, ilinniarfissuarmilu ilinniartitsisunngorniarluni.

Pisiassat akitsornikuuneri ilinniartuulluni qanoq sunniuteqarpa?

- sunniuteqarpoq, soorunami massakkut takunerusinnaavara pisiassat akii qaffarujussuartut annikilliornaqaaq, soorlu uanga qaammammusiguma marlunnik meeraqarlunga 6.700-nakkuma saniatugut internet akilertariaqarpara internetseqartariaqaratta kollegiat vuggestuit, taavalu immaqa Netflix isiginnaartassagutta, taama Gigi Kruse Poulsen oqarpoq.

- Akiligassat tamarmik akilereerlugit sinneruttut 28 dags middaginut kukilerpunga akitsungaarmata neqit taakkua. Qaammat kingulleq niiverniarlunga malugisimanagu akitsortutu, neqit takulerlugit 59 koruuni. Neqisisariaqarlungalu nerisariaqaratta. Taava kisiat aningaasatikka sukkanermik appariartupiluussapput malunnartorujussuarmik.

Qanoq uumaniartarpisi?

- Unneqqarissaguma ilaannikkut anaanannut ataatannulluunniit oorimik qinusariaqartarpunga, taava qaammammusereeraangama aamma utertittariaqartarlugit.

Qanoq iliortarpisi?

- pisiassat akitsorneri peqqutaalluni niiverniarnissaq nakernarneq ajorpoq, pisilaassagutta kisiat tassa taamannaannaq akiliilluta. Taava uanga tilbudiinnarnik ujaasisarpunga, tilbudiinngikkaangatalu allatut ajornartumik pisiarisaqaraangata pisiarisarlugit. Akit qaffangaarmata akikittoqarunnaarnikuuvoq.

AAMMA ATUARUK Pilersuisoq: Corona Ukrainemilu sorsuttoqarnera akinik qaffatsitsivoq

Qanoq isumaqarfigaajuk pisiassat akitsorneri?

- Paasisinnaavara nunarsuarput qanoq ingerlanera. Ilinniartut aningaasarsiaat qanga qaffanneqarnersut eqqaamanngilara, ullutsinnut malinnaassagaanni naammakkunnaarnikuuvoq, nalunngilara saniatugut suliffeqartariaqarneq kisianni uanga ilinniartuullunga sulilissaguma skatsip akissarsiakka affangajaa pisarpai, sulikulooraluaruma akissarserpiarnaviarnanga, taava atuarninnut qanoq nukissaqassagama.