Larsine Frederiksen: Nioqqutissat akitsungaarmata pisiarisartakakka allanngortippakka
Nunarsuarmi nioqqutissat akiisa qaffannerat ilutigalugu nunatsinni nioqqutissat akii aamma qaffapput.
Assersuutigalugu manniit arfinillit ukiup aallartinnerani 19,95 koruunillit, maanna 21,95 koruuneqarput.
Uummannami najugallip Larsine Frederiksenip tamanna malugeqaa:
- Isumaqarpunga pisiassat akii qaffasippallaarujussuartut.
AAMMA ATUARUK Nioqqutissat ilaat akitsorrattut: Qallersuutissat 10 koruuninik akitsortut
Larsine Frederiksennip ulluinnarni niuerniaraangami pisiarisartagai nioqqutissat akitsornerisa kingunerisaannik allanngortariaqarsimasut, KNR-imut oqarluttuarpoq.
- Pisiarisartakkakka akit qaffannerisa kingunerisaannik allanngorput, akikinnersiuinerulerpunga
Sooruna?
- Inuussutissat akiisa qaffannerisa inuuniarnermut sunniutai annertummata.
Manniit arfinillit Davameersut: Januaarimi 19,95 kr. - maanna: 21.95 kr.
Makkariina siatsisissaq Rema 1000-meersoq, 500 g: Januaarimi 10,95 kr. – maanna 15,95 kr.
Qallersuut Salami Gølimeersoq 250 g: Januaarimi 24,95 kr. – maanna 34,95 kr.
Makkariina siatsisissaq Omameersoq, 500 g: Januaarimi 21,95 kr. - maanna 29,95 kr.
Qallersuutissat Rullepølset Pålækkerimeersut, 90 g: Januaarimi 21.95 kr. – maanna 28.95 kr.
Tusarfik: Pilersuisoq
Pilersuisummi nioqqutissaataani pisiariortorneqakkajuttuni 50-init ikinnerunngitsut qaammatit arfineq-pingasut ingerlaneranni 0,4 procentit 50 procentillu akornanni akitsortut, Pilersuisoq KNR-imut ilisimatitsivoq.
Brugsenimi nioqqutissat ilaat aamma akitsorrattut, Brugsenip Nuummi Brugseni Avannaanilu tuniniaanermi pisortaa Jes Nyborg oqarpoq.
- Nioqqutissaatitsinni ingammik inuussutissat ilaat akitsorrapput, Jes Nyborg oqarpoq.
Igaassat 520 koruuninik akitsortut
Larsine Frederiksenip Uummannami Pilersuisumi nioqqutissataani igaassat akiisa akitsungaatsiarsimaneri maluginianngitsuunngilaa.
Taassumami igaassat pisiarisartagai akikinnerusaraluaraluarput.
- Uku igaassat assersuutigisinnaavakka. Siornatigut 50 koruunit sinnilaaginnarlugit akeqarput, maannali 119 koruuneqarlutik.
- Aamma neqit allat 100 koruunit sinnerlugit akeqalersimapput. Neqit akii immaqa 30 koruunit missaannik akisunerulersimapput, Larsine Frederiksen oqarpoq.
AAMMA ATUARUK Ataatsimut isigalugu: Nioqqutissat qulit uku akitsornerpaapput
Pilersuisumi nioqqutissani akitsornerpaatut allattorsimasut ilagaat nersussuup neqaa asertortigaq, taanna 16,34 procentimik akitsorpoq.
Assersuutigalugu Pilersuisumi ullunut 28-nut igaassat januaarip aallaqqaataani 1.390 koruunillit maanna 1.910 koruuneqarpoq, tassa 520 koruuninik akitsorput.
Uuliap akitsornera peqqutaaqataasoq
Uulialli akitsornera nioqqutissat ilaat akitsorrannerannut kisimi peqqutaanngilaq. Nunarsuummi ilarujussuani inuussutissaalatsilertoqarnera aamma peqqutaaqataavoq.
Nunarpulli tamatumani soorlu Danmarkitulli eqqorneqartiginngilaq. Danmarkimimi nioqqutissat pisiariortorneqakkajuttut ilaat siorna aggustiminngarnit agguaqatigiisillugu 8,7 procentpointimik akitsorrapput.
Naatsorsueqqissaartarfik kisitsisinik aningaasat naleerukkiartornerannut tunngasunik septembarip naanerani saqqummiissaaq.
