Ilinniartunut inissiat milliardip affaanik nalillit Namminersorlutik Oqartussanit sanaartorneqalersut
Sanaartornissamut pilersaarut nutaaq aallartinneqarpoq.
Ilinniartunummi inissiat nutaat 524-t nunatsinni illoqarfinnut annernut tallimani sanaartorneqarnissaat, Naalakkersuisut kiisalu Aningaasaqarnermut Akileraartarnermullu Ataatsiimiititaliap akuereqqammerpaat.
Pilersaarutit 511 millionit koruuninik naleqarpoq.
Kollegiani siniffissat ima agguataarneqassapput
- Nuummi siniffissat 218-it nutaat 2023-mi qaammatit pingasukkaat sisamaanni
- Qaqortumi siniffissat nutaat 100-t 2022-mi qaammatit pingasukkaat pingajuanni
- Sisimiuni siniffissat nutaat 72-it 2024-mi qaammatit pingasukkaat sisamaanni
- Ilulissani siniffissat 70-it nutaat 2023-mi qaammatini pingasuni siullerni
- Aasianni siniffissat nutaat 64-it 2023-mi qaammatini pingasuni siullerni
Ilinniartunut inissiat sanaartorneqalernerat Ilinniartitaanermut naalakkersuisup Katti Frederiksenip nuannaarutigaa:
- Ilinniartunut inissianik sanaartornermik aallartitsisinnaalernerput ilinniartutsinnut isumaqartorujussuuvoq. Ilinniakkat qaffassarnissaannik anguniakkagut eqqarsaatigalugit sanaartugassat taakku pingaaruteqarput, tassanilu maanna ilinniartutsinnut ilinnialersussanullu sinaakkutissanik pitsaanerpaanik qulakkeerinissarput pingaaruteqarpoq, Katti Frederiksen tusagassiutinut nalunaarummi oqarpoq.
Illuliassat assigiinngitsut sisamat pilersaarutigineqarput
Ineqarnermut Attaveqaqatigiinnermullu Naalakkersuisoqarfik sanatitsisutut isumaginnittuuvoq, Ilinniartitaanermut naalakkersuisoqarfik matumani suleqatigineqarsimalluni.
Ilinniartunut inissiat suliassatut immikkoortutut tallimatut neqerooruteqartitsivigineqarput, suliarinnittussallu tassaallutik MT Højgaard, BJ Entreprise KJ Greenlandilu.
Sanaartugassat katillugit 14.191 m2-inik annertussuseqarput, illunullu 16-inut agguarneqassallutik, sanariaatsillu assigiinngitsut pingasut atorneqassallutik.
- Suliassami suliassamut malitassaq nalinginnaasoq, immikkut ittumik siunnerfiusut apeqqutaatillugit illuliassanik assigiinngitsunik sisamanik imaqartoq tunngavigineqassaaq, naalakkersuisut nittartakkaminni ilaatigut allapput.
Missiliukkat qaangiiffigineqartut
- Tunuliaqutassatut pisariaqartitanik misissueqqissaarnermi takutinneqarpoq, ukiut qulit iluanni siniffissat 1.000-erpiaat atorfissaqartinneqalertussaasut, siniffissallu 524-t siulliit sananeqartussat maannarpiaq pisariaqartitanut naammattussaapput, naalakkersuisut tusagassiutinut taama allapput.
Isumaqatiginninniartoqareernerani akit tamarmiusut illoqarfinni tallimaasuni tamani missiliukkat procentinngorlugit assigiittorujussuarnik 8,7 procentinik qaangiiffigineqarput.