Knud Mathiassen: Taamaammat Naleqqamut nuuppunga

Naleraq Inatsisartuni nutaamik ilaasortaqalerpoq. Tassalu Knud Mathiassen Inuit Ataqatigiinnit siorna apriilimi ilaasortaajunnaarsitaanerata kingornali Inatsisartuni attaviitsuulersimasoq.

Taanna ilaasortaajunnarsinneqarnermi kingorna paniminut nakuusersimasutut unnerluutigineqarpoq, eqqartuussiveqarfimmiilli Nunatta Eqqartuussisuuneqarfianit pinngitsuutinneqarpoq.

Nunatta Eqqartuussisuuneqarfiata Knud Mathiassen sapaatip akunnerata siuliani pinngitsuutippaa. Maanna sapaatip akunnera qaangiutivinngitsoq taassuma aqqa Naleqqap ilaasortaasa allassimaffianniilerpoq.

- Uanga politikkikkut anguniakkakka naleqartitakkalu, minnerunngitsumillu nunarput tamaat isigalugu anguniagaanut naleqartitaannut aamma assingusorujussuupput. Minnerunngitsumillu aggerfiga tunngavigalugu.

Knud Mathiassen Kuummiuneersuuvoq, Tasiilamilu ullumikkut najugaqarluni.

- Soorlu Tasiilap immikkut kommuninngornissaa, imaluunniit piniartut aalisartullu atugaannut kissaateqartarsimavunga, kiisalu meeqqat atugaat ilungersunartut pillugit anngussisarsimavunga. Soorunami inuiaqatigiit atugaat pillugit saqqummiussisarsimavunga, tassanilu soorunami naleqartitagut anguniakkagullu naalakkersuinikkut anguniaraangatsigit timitalersornissaat pingaaruteqartarmat, kissaatikkalu tamaasa soorunami pisinnaannginnakkit sakkortuuliortarsimavunga.

Assigiinngitsunik anguniagaqarusuttut

Inuit Ataqatigiit siulersuisuunerisa Knud Mathiassenip peersinneqarnera KNR-imut aatsaat siullermeertumik oqaaseqarfigaat. Ilaasortaajunnarsinneqarneranut aalajangiinermi nakuusernermut tunngatillugu suliaq, maanna pinngitsuutinneqarluni naammassineqareersoq kisiat pissutigalugu ilaasortaajunnaarsinneqanngitsoq, Inuit Ataqatigiit politikkikkut siulittaasuata tullia, Agathe Fontain oqarpoq.

- Ilaasortaajunnaarsitsinermi tamanna kisimi pissutaanngilaq. Arlalinnik pissuteqarpoq, taanna oqarpoq.

Tamanna IA-p Knud Mathiassenillu assigiinngitsumik anguniagaqarniarneranut aamma tunngassuteqarpoq.

- IA-mi Inatsisartunut ilaasortat politikkikkut naleqartitagut malillugit sulinissaat pingaartitaraarput. Kisianni oqarsinnaavunga, IA taassuma suliaqarneranut aamma piffissani ikiorneqarnissamik pisariaqartitsineranut sapinngisaminik ikiuuttarsimammat, sulinerminimi ajunngitsumik ingerlanissaa kissaatigisimavarput, Agathe Fontain oqarpoq.

Eqqartuussivimmi aalajangiisoqarnissaanut utaqqeqqaarsimassagaluarpugut

Tamannali Knud Mathiassenimut sunniuteqarpasikkunnaareersimavoq.

- Namminneq tunuartitsisimanertik namminneq akisussaaffigissavaat. Namminneq isummerfigissavaat. Uanga ingerlariaqqippunga, politikkimillu sulinera nangillugu, taanna oqarpoq.

IA-p siulersuisuunerisa Knud Mathiassenip siorna apriilimi ilaasortaajunnaartinneqarnissa aalajangerpaat. Tamanna Tasiilami IA-p immikkoortortaqarfianit inassuteqarnerup kingorna pivoq. Tassani Eva Qeqe Kristiansen maanna siulittaasup tullerisimasarilersimasaa issiasimavoq – taassumalu immikkoortortaqarfiup aalajangiinissamut sukkavallaalaarsimanera nassuerutigaa.

- Kunuup meeqqaminik annersaasimanera pillugu Haraldip (Bianco, aaqq. IA-p Tasiilami siulittaasua) taamanikkut sianerfigivaatigut. Kunuup paniminik annersaasimanera pillugu tunuartariaqartoq. Uagut taamanikkut sianerfigigamitigut ingerlaannaq akuerisimavarput, meeqqanut annersaasoqaqqusaanngitsoq nalunnginnatsigu, taanna oqarpoq.

- Kunuup peersinneqarnissaa pillugu aalajangiinnginnitsinni eqqartuussivimmi aalajangiisoqarnissaanut utaqqeqqaarsimassagaluarpugut. Taanna utaqqisimannginnatsigu allaanngilaq uagut eqqartuussisuulluta, Kunuk peersikkipput.

Eva Qeqe Kristiansenip Knud Mathiassen aamma nammineq malippaa. Taassuma IA qimappaa Naleqqallu immikkoortortaqarfianut nuulluni.