Knud Mathiassen nunatta eqqartuussisuuneqarfianit pinngitsuutinneqartoq

Nunatta Eqqartuussisuuneqarfiata Inatsisartunut ilaasortap, Knud Mathiassenip paniminut nakuusersimanissaanut aamma uppernarsaatissaqartinngilaa.

Allattoq Hanna Vestergaard Hviid

januaarip 25-at 2024 14:44

Knud Mathiassenip oqaaseqarneranik nalunaaqutaq 16.20 nutarterneqarpoq.

Inatsisartunut ilaasortaq, attaviitsoq, Knud Mathiassen paniminut nakuusersimasutut Nunatta Eqqartuussisuuneqarfiani ullumi unnerluutigineqarnermini pinngitsuutinneqarpoq.

Kalaallit Nunaanni Politiit tusagassiuutinut nalunaarummi paasissutissiipput.

Suliaq Nuummi eqqartuussivimmi 2023-mi oktobarip aqqaneq-aappaani ingerlanneqarmat aamma pinngitsuutinneqarpoq.

Unnerluussisussaatitaasulli suliap Nunatta Eqqartuussivianut suliarineqaqqitassanngortippaat. Suliaq maanna naammassineqarpoq.

Allaaserisaq taamaammat allapparput

Nalinginnaasumik KNR-iiit pinngitsuutitaanerit eqqartorneq ajoraluarpagut.

Knud Mathiassenimilli suliaq allaavoq. Qinikkatut sulivoq attaviitsutullu Inatsisartuni ilaasortalluni.

KNR-imit taamaammat nalilerneqarpoq, oqaluttuap saqqummernissaa tamanut soqutiginaateqarluartoq.

Unnerluussissut naapertorlugu panimi naavata niuisalu nalaatigut ikinnerpaamik arfineq marloriarluni annersarsimavaa.

Tamanna paniata arfineq-marluk missaannik ukioqarnerani apriilimi 2022-mi pisimanerarneqarpoq.

- Tassa nuannaarutigalugu nalunaarutigisinnaanngorpara Nunatta Eqqartuussiviani ullumi pinngitsuutitaavunga. Inatsisartuni sulinera pisarnermisut nangissavara. Tassani eqqartuussaanera aamma avammut saqqummiunneqaqattaareernikuuvoq paniga pillugu. Panimma aallaamarujussuartarnera paatsoorneqarluni ajortumut sangutinniarneqarmat uannut imaannaanngitsuusimavoq, kisianni massakkut eqqortoq ajugaavoq.

IA-mit anisinneqartoq

Knud Mathiassen Inuit Ataqatigiit sinnerlugit Inatsisartunut qinigaavoq. Qinikkap unnerluutigineqarsinnaannginnera 2023-mi apriilimi upernaakkut ataatsimiinnermi atorunnaarsinneqarpoq.

Qinikkamik inatsisinik unioqqutitsisoqarsimaneranik pasisaqarnermi tamanna pisarpoq.

Sapaatip akunnera qaangiummat IA-mit anisinneqarpoq. Qinikkap taamaalinerani pinerluutigineqartup sumut tunnganera oqaaseqarfigiumanngilaa.

Pineqartoq Inatsisartuni ullumikkut attaviitsuuvoq.

Knud Mathiassenip Inatsisartuni nalinginnaasumik suliinnarnissani KNR-imut paasissutissiissutigaa.

IA-mi ilaasortaaleqqissavit?

- Inuit Ataqatigiinniit tunuartitaanikuunera siullermik taamanikkut tupaallaatigisimavara. Kisianni aappaatigut tupaallaatiginagu inunnut ataasiakkaanut eqqartuussisutut pissusilersorfigisimammannga tupaallaatigivallaarsimanngilara. Tassa takorloorsinnaanngilara Inuit Ataqatigiinnut uteqqinnissara, Knud Mathiassen oqarpoq.

Taassumalu partiimi allami ilaasortaalernissamut periarfissaq ammaffigaa, partiimilu tassani nammineq naleqartitanilu takusinnaasarissavai. Partiimilli aalajangersimasumik ilaasortaalerfiginiarusussinnaasaminik eqqaasaqarsinnaanngilaq.

- Nuannaartorujussuuvunga. Nuannaarutigivara ingerlariaqqissinnaanngorama. Una inuttut ukiut marlungajaat ingerlanerini suliaq ingerlasimavoq. Tamatumalu nalaani tunuartitaasimavunga, kisianni ingerlariaqqissaanga. Tamanna nuannaarutigisorujussuuvara, Knud Mathiassen oqarpoq.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.